Aliçka: Perceptimi i të huajve për Shqipërinë, nuk përputhet me realitetin

Shkrimtari dhe pedagogu Ylljet Aliçka, në një intervistë për Zërin e Amerikës, diskutoi mbi largimin e të rinjve nga Shqipëria, perceptimin e vendit në arenën ndërkombëtare dhe sfidat për ruajtjen e gjuhës shqipe.

Largimi i të rinjve dhe sfida në universitete
Aliçka e cilësoi largimin e të rinjve si një fenomen global, por vuri theksin te dobësitë e universiteteve shqiptare, si niveli akademik dhe mungesa e kërkimit shkencor. Ai sugjeroi përmirësimin e standardeve, krijimin e kushteve për tërheqjen e studentëve të huaj dhe rritjen e mobilitetit akademik brenda vendit.

Perceptimi ndërkombëtar për Shqipërinë
Aliçka theksoi se perceptimi ndërkombëtar për Shqipërinë shpesh anon drejt klisheve negative, të cilat nuk përputhen me realitetin. Ai shtoi se krijimtaria e tij, veçanërisht libri Ndërkombëtarët, synon të demitizojë rëndësinë e opinionit të huaj dhe të nxisë një analizë më të thelluar të realitetit shqiptar.

Ruajtja e gjuhës shqipe
Duke folur për Fjalorin e Madh të Gjuhës Shqipe, Aliçka e cilësoi atë një “gur kilometrik” për kulturën shqiptare. Ai nënvizoi rëndësinë e gjuhës si bazë e identitetit kombëtar dhe bëri thirrje për respektimin e standardeve gjuhësore në nivel institucional dhe shoqëror.

Gjatë vizitës së tij në Shtetet e Bashkuara, Aliçka pritet të marrë pjesë në disa takime me intelektualë dhe të promovojë krijimtarinë e tij, e cila është përkthyer në 14 gjuhë të huaja.