Botë Nga Bota Evropa

Ekspertët të fushave të ndryshme tregojnë se çfarë presin nga viti 2025

Para 6 dite

Figura të shquara nga fusha të ndryshme ndajnë parashikimet dhe shpresat e tyre për vitin 2025, duke reflektuar mbi potencialin për ndryshim dhe sfidat që mund të na presin.

Wim Wenders, Luisa Neubauer dhe të tjerë theksojnë rëndësinë e vendimeve që marrim sot për të ardhmen, si dhe vlerën e të vërtetës.

Bertrand Piccard, eksplorues zviceran dhe themelues i Solar Impulse, vë theksin te ndikimi i vendimeve aktuale në të ardhmen.

Ai deklaron se “parashikimet e mia për vitin 2025 varen tërësisht nga vendimet dhe sjelljet tona sot. Nëse heqim dorë nga lëndët djegëse fosile, do të kemi një mjedis më të mirë”.

Këto mendime reflektojnë rëndësinë e veprimeve të përditshme për të ndërtuar një të ardhme më të ndritshme, shkruan euronews.

“Nëse kemi më shumë mirësi, urtësi dhe dhembshuri, bota do të jetë një vend më i mirë. Nëse kemi më pak varfëri, do të ketë më pak luftëra. Prandaj, veprimi varet nga ne”, shtoi ai.

Luisa Neubauer, aktiviste gjermane për mbrojtjen e klimës

Luisa Neubauer shpreh shqetësim për katastrofat e mundshme dhe luftën për të vërtetën.

“Për vitin 2025, kam frikë se do të përjetojmë një valë të re katastrofash. E dyta është një betejë e çmendur për të vërtetën”, deklaroi ajo.

“E vërteta do të jetë malli më i vlefshëm në vitet që vijnë dhe do të luftohet nga shumë anë. Gjithashtu, e treta që parashikoj për vitin e ardhshëm janë histori heroike të pabesueshme”, shtoi Neubauer.

Doowy, këngëtar belg

Doowy parashikon një zhvendosje drejt lidhjeve të sinqerta sociale.

“Për vitin 2025, dua të parashikoj një shëndet digjital shumë më të mirë se sa ai që njohim aktualisht. Uroj që të fokusohemi vërtet te miqtë tanë”, tha ai.

“Parashikoj një vit ku ne përqendrohemi te lidhjet tona të vërteta sociale dhe jo te ato që nuk janë të vërteta”, pohoi këngëtari.

Nieves Herrero, gazetare dhe shkrimtare spanjolle

Nieves Herrero ndan parashikimet e saj plot shpresë “E para: fundi i luftërave, luftës në Ukrainë, luftës në Gaza… shumë viktima, shumë dhimbje, shumë dhunë”.

“Së dyti, shpresoj që të gjithë të kemi sukses me shkrimet tona për të promovuar harmoninë. Dhe së treti, shpresoj që gratë të mos jenë më viktima të dhunës në shtëpitë tona, duke arritur një vit 2025 me barazi dhe respekt”, shtoi ajo.

Paul Watson, aktivist kanadez për të drejtat e kafshëve dhe themelues i Sea Shepherd Conservation Society

Paul Watson është optimist për ndalimin e gjuetisë së balenave dhe rritjen e ndërgjegjësimit mjedisor.

“Parashikimet e mia për vitin 2025 janë, para së gjithash, se besoj se mund të ndalojmë gjuetinë e balenave në Islandë”, theksoi ai.

“Së dyti, mendoj se do të sjellim më shumë ndërgjegjësim në Ishujt Faroe të Danimarkës për të ndalur masakrën mizore të delfinëve dhe balenave piloto atje. Gjithashtu, do të ushtrojmë presion mbi Japoninë për të ndalur gjuetinë e balenave”, pohoi Watson.

Wim Wenders, regjisor gjerman

Wim Wenders shpreh shqetësim për drejtimin e politikës globale dhe klimës.

“Ky planet po vuan jashtëzakonisht shumë. Gjithçka po shkon në drejtimin e gabuar”, tha artisti.

“Për sa i përket politikës, idetë e vjetra që nuk funksionuan më parë po kthehen. Nacionalizmi është përsëri në rritje. Ideja e Europës është një ide shumë më e bukur”, përfundoi ai. /Telegrafi/