Kuvendi Shqipërisë voton sot buxhetin e vitit 2025, Berisha kthehet pas 11 muajsh mungesë

Kuvendi i Shqipërisë pritet të miratojë sot buxhetin e vitit 2025. Pasi ka kaluar shqyrtimin dhe diskutimet në të gjitha komisionet parlamentare, tashmë buxheti do të miratohet nen për nen dhe në tërësi në Kuvend.

Në seancën e sotme rikthehet pas gati një viti mungese për shkak të arrestit shtëpiak kreu i Partisë Demokratike Sali Berisha, i cili buxhetin prej 8.2 miliard eurosh e ka konsideruar si draftin e vjedhjeve të mëdha.

Rikthimi i Sali Berishës përkon me depozitimin e 34 amendamenteve të PD-së për buxhetin e vitit të ardhshëm, mes të cilave dy mbajnë firmën e tij. Ndërkohë, 11 amendamente janë depozituar nga Partia e Lirisë, përmes së cilave kërkohet një shtesë në buxhet me rreth 45 miliardë lekë.

Një ditë më parë kreu i grupit të Partisë Socialiste Niko Peleshi u ka kërkuar deputetëve të jenë të pranishëm dhe aktiv në seancën e sotme ku do të diskutohet buxheti. Në porosinë që u dha deputetëve socialistë ishte vëmendja në amendamentet e PD-së për buxhetin.

Ndër amendamentet e propozuara nga PD përfshihet caktimi i minimumit jetik në 200 euro, rritja e pensioneve dhe deri te shtimi i fondeve për Onkologjikun etj. Ndërsa Partia e Lirisë ndalet tek pensionet, rritja pagave por dhe ndihmës ekonomike kryesisht.

Në parim buxheti me një vlerë prej 8.2 miliardë euro u votua në 19 dhjetor mes debateve dhe protestave me 75 vota pro, 40 kundër dhe asnjë abstenim. /Telegrafi/