Hamza viziton rezervuarët e ujësjellësit, thekson rëndësinë e sigurisë dhe normalitetit

Pas shpërthimit në kanalin Ibër-Lepenc, kryetari i Komunës së Mitrovicës, Bedri Hamza ka vizituar rezervuarët e Kompanisë Rajonale të Ujësjellësit “Mitrovica” për të parë nga afër progresin në sanimin e dëmeve.

Hamza ka shprehur mirënjohje për qytetarët të cilët sipas tij, po tregojnë durim e mirëkuptim dhe ka falënderuar zyrtarët e angazhuar për punën e tyre, shkruan Telegrafi.

“Hamza falënderoi zyrtarët e angazhuar në vendngjarje për punën e tyre të palodhshme dhe shprehu mirënjohjen për qytetarët, të cilët po tregojnë durim dhe mirëkuptim. Ai falënderoi gjithashtu mediat për raportimin korrekt dhe partnerët ndërkombëtarë për reagimet e shpejta dhe të vendosura në lidhje me situatën në veriun e vendit”, thuhet në njoftim.

Ai është shprehur se siguria e qytetarëve, infrastruktura publike, ruajtja e rendit dhe rikthimi i normalitetit janë “prioritete absolute”.

“Kryetari Hamza theksoi se siguria e qytetarëve, infrastruktura publike, ruajtja e rendit dhe rikthimi i normalitetit janë prioritete absolute për të gjithë”, thuhet tutje në njoftim. /Telegrafi/