Në seancën e së premtes, më 29.11.2024 ndaj të akuzuarit për krime lufte, Sllagjan Trajkoviq janë dëgjuar dy dëshmitarë.

Slagjan Trajkoviq po akuzohet nga prokuroria se në periudhën kohore 1998-1999, në fshatin Reznik dhe fshatrat përreth të Komunës së Vushtrrisë, individualisht dhe në bashkëkryerje me persona të tjerë, si pjesëmarrës i forcave policore dhe ushtarake serbe ka kontribuar në vrasje, bastisje, rrahje, maltretim, arrestime, torturë, trajtim në mënyrë mizore dhe çnjerëzore, mbajtje në kushte skllavërie, dëbim dhe deportim të mijëra civilëve shqiptarë.

Fillimisht në seancën e sotme, i pari që dha dëshminë para trupit gjykues ishte dëshmitari Avni Selimi, i cili vazhdoi dëshminë e tij nga seanca e kaluar e datës 26.11.2024.

Dëshmitari Selimi tha se nuk kishte qenë në dijeni se ndonjë familjar i tij kishte qenë pjesëtar i UÇK-së.

Pasi që dëshmitari tha se nuk është në dijeni, mbrojtësi i të akuzuarit Slagjan Trajkoviq, avokati Dejan Vasiq i tregoj një foto nga telefoni dëshmitarit Selimi, në të cilën ishte një foto e vëllait të tij me uniformë të UÇK-së. “Pse nuk e thatë që vëllai juaj ka qenë pjesëtar i UÇK-së”, e pyeti mbrojtësi i të akuzuarit Trajkoviq, avokati Dejan Vasiq.

“Sepse unë nuk jam në dijeni që ai ka qenë pjesëtar, megjithatë çdo 28 nëntor, ne vishemi me tesha të UÇK-s dhe dalim në shëtitje, por unë nuk jam në dijeni se ai ka qenë pjesëtar i UÇK-së.” – tha dëshmitari Selimi.

“Asnjëherë nuk e ka pasë llaf me mu baba që Tahiri ka qenë pjesëtar i UÇK-së, po ashtu nuk kam asnjë arsye ta fsheh ketë gjë, madje do të mburresha, përndryshe unë qysh kam specifikuar për djalin e axhës, që ka qenë pjesëtar i UÇK-së, po ashtu do të deklaroja për vëllain tim”, shtoi tutje dëshmitari Selimi në pyetjet e avokatit Vasiq.

Ai gjatë dëshmisë së tij, u pyet nga ana e avokatit, Dejan Vasiq edhe për vrasjen e H.S..

“Unë kam dëshmuar deri tash vetëm për atë çfarë kam parë me sytë e mi, kur kanë hy forcat serbe, H., ka qenë në shtëpinë e vet, prej aty ka lëvizë dhe ka shku tek fëmijët e mi ku i kanë qit para pragu, ka nejt me fëmijët e mi para pragu, kur janë tutë fëmija e mi, tash po flas çka kam të dëgjume, nuk e kam parë momentin e vrasjes së H., Slagjani e din kush e ka vra” – tha dëshmitari Selimi lidhur me këtë pyetje.

“A ju ka treguar babai për këtë, kush e ka vra H.,” ?, ishte pyetje e radhës e cila ju drejtua nga avokati Vasiq, dëshmitarit Selimi.

Dëshmitari tha se sipas babait të tij, i akuzuari Slagjan Trajkoviq ishte ai që e kishte vrarë H.S..

“Po, sipas babait tim ai ka thënë që H., e ka vra Slagjan Trajokoviqi, ndërsa unë nuk e kam parë”, tha dëshmitari Selimi.

Selimi gjatë dëshmisë së tij tha se e ndjera H., ka qenë në dy pjesë të trupit e therur dhe i kishte pasur dy plagë. I njëjti tha se kur H.,  ishte futur nga forcat serbe në shtëpi, babai tij kishte thënë se atë e kishte vrarë i akuzuari Slagjan Trajkoviq.

“Deklaroj se në bazë të asaj që më ka thënë babai, këtë vrasje e ka kryer Slagjani, ndërsa unë nuk mund të them që e ka vra Slagjani pasi nuk e kam parë me sytë e mi”,  tha Selimi.

I akuzuari Slagjan Trajkoviq pyeti dëshmitarin Selimi se pse ai nuk e kishte paraqitur në polici atë kur ishin bërë hetimet nga ana e UNMIK-ut dhe EULEX-it.

Lidhur me këtë, dëshmitari Selimi tha se “atëherë ka dhënë baba i ndjerë dëshmi dhe unë tu mendu që ky është diku në Serbi, andaj dhe nuk kam shku me dhënë deklaratë”.

Lidhur me vrasjen e H.S., dhe L.S.,  prokurorja Salihu-Shamolli, njoftoi se lidhur me këtë rast janë pushuar hetimet ndaj të akuzuarit Slagjan Trajkoviq dhe vëllaut të tij, nga ish prokurorët e EULEX-it, duke shtuar se kjo pjesë nuk është më çështje e akuzës.

Tutje, seanca ka vazhduar edhe me dëshminë e dëshmitarit Avni Milenica.

Në pyetjen e prokurores Salihu Shamolli për datën 22 maj 1999 se çfarë kishte ndodhur këtë ditë. Dëshmitari Milenica tha se me datë 22 maj 1999 ishin njoftuar nga axha i tij se kishin qenë të rrethuar.

“Me 22 maj, rreth orës 08:00  të mëngjesit, axha jem ka ardhë në oborr në shtëpinë time, na ka njoftuar që jemi të rrethuar edhe presin që në çdo moment me na qit prej shtëpisë, rreth orës 08:35-08:40. Njësiti special i forcave Jugosllave ka hy në oborrin tonë, kanë qenë 5-7 vetë edhe na kanë urdhëru me dal me kërkesën që kemi me shku te një vend i caktum për me i marrë  do kartona të gjelbër”, tha dëshmitari Milenica.

Tutje, dëshmitari Milenica tha se në rrugë ishin takuar me fqinjët e tyre që kishin qenë diku afër 50-60 persona dhe se rruga kishte qenë me ushtarë të njëjtë të Njësisë Speciale.

Dëshmitari Milenica tha se një grup që kishte qenë aty me rroba ushtarake i kishin grumbulluar para një dyqani jo funksional dhe se kishin filluar t’i ndajnë njerëzit, dhe ndarja kishte qenë e rastësishme.

“Pas ndarjes fillestare diku 13-15 persona po të njëjtit kanë filluar me u marrë grave vathët, varset, orët dhe pas asaj kanë fillu me i marrë 3-4 vetë e ndër ta më kanë ftu edhe mua,.. me një fjalë time dhe unë kam thënë që jam i sëmurë dhe ata më kanë thënë të qëndroj aty, … njëri prej atyre personave ka bërtitur me të madhe, këta për neve le të shkojnë kah varrezat, këta të tjerët, ata që i kishin nda, tash janë të tutë”, shtoi tutje dëshmitari Milenica.

Dëshmitari Milenica tha se në vendin te varrezat kishte qenë një hapësirë, fushë e madhe ku kishin qenë diku rreth 30 mijë njerëz.

Dëshmitari Milenica tutje tha se ishte formuar edhe një korridor i përbërë nga ushtarët në të cilën ishin dashur të kalojnë të gjithë.

Dëshmitari tha se personat që ishin marrë në fillim ishin vrarë të gjithë dhe të njëjtit ishin gjetur në mënyra të ndara, në varrezat e Batainicës në vitet 2000-2013. Dëshmitari po ashtu tha se në atë ditë ishin vrarë 68 persona, në të cilën një vajzë është ende e pagjetur.

Dëshmitari për të pandehurin Slagjan Trajkoviq tha se e kishte parë në kordonin që ishte formuar dhe i njëjti i kishte thënë ‘Prapë ti’.

“Personat që na kanë hy në shtëpi nuk i kam njohur, ndërsa në kordonin të cilin e shpjegova ka qenë një person, bashkëvendas i joni.,..  e kam ditur që është polic dhe e ka emrin Slagjan’ – tha tutje dëshmitari Milenica.

Tutje, dëshmitari tha për të akuzuarin Trajkoviq se e kishte parë në kordon dhe i njëjti kishte qenë i armatosur.

“Ka qenë i njëjti person që i ka qëllu njerzit me atë ‘kroqen’, personi që i ka goditur personat në atë kordonin me ‘kroqe’ ka qenë i akuzuari Slagjan Trajkoviq, ka qenë me uniformë, e po ashtu ka qenë edhe i armatosur, e ka pasur të  varur një kallashnikov”, tha dëshmitari Milenica.

Dëshmitari Milenica tha se në anën tjetër të kordonit kishte qenë edhe vëllai i të akuzuarit Slagjan Trajkoviq, por që emri tha se nuk i kujtohej.

Në pyetjen e avokatit Vasiq, se prej nga e kishte ditur se të njëjtit janë vëllezër. Dëshmitari tha se pas datës 22 maj 1999 ishte interesuar për të ditur se kush janë.

Pasi ishte përfundimi i orarit të punës, seanca u ndërpre. Seancat lidhur me këtë çështje penale janë caktuar për në muajin dhjetor.

Ky rast po trajtohet ne përbërje të trupit gjykues nga Ngadhnjim Arrni ( kryetar ) dhe anëtarët Arben Hoti dhe Kushtrim Shyti.

Ndërsa aktakuza po përfaqësohet nga prokurorja Florije Salihu -Shamolli.

Çfarë thotë dosja e prokurorisë

Sipas dosjes së Prokurorisë Speciale, i pandehuri Slagjan Trajkoviq dyshohet se gjatë kohës së luftës në Kosovë, në periudhën kohore 1998-1999, në fshatin Reznik dhe fshatrat përreth të komunës së Vushtrrisë, individualisht dhe në bashkëkryerje me persona të tjerë, si pjesëmarrës i forcave policore dhe ushtarake serbe ka kontribuar në vrasje, bastisje, rrahje, maltretim, arrestime, torturë, trajtim në mënyrë mizore dhe çnjerëzore, mbajtje në kushte skllavërie, dëbim dhe deportim të mijëra civilëve shqiptarë.

Po ashtu, ai dyshohet edhe për masat e plaçkitjes, djegies dhe shkatërrimit të shtëpive të popullsisë civile të nacionalitetit shqiptar që nuk kanë marrë pjesë drejtpërdrejt në konflikt.

“Duke shkelur kështu rëndë rregullat e të drejtës ndërkombëtare gjatë kohës së luftës, katër Konventat e Gjenevës të vitit 1949 dhe protokollet shtesë”, thuhet në dosjen e prokurorisë.

Gjykimet për krime lufte

Për masakrat dhe krimet e tjera të luftës dhe krimet kundër njerëzimit të kryera në Kosovë nga forcat serbe e jugosllave gjatë luftës së viteve 1998/1999 ishin gjykuar, e disa edhe dënuar, ish-udhëheqësit më të lartë politikë dhe ushtarakë të Jugosllavisë së mbetur dhe të Serbisë.

Ish-presidenti i Jugosllavisë, Sllobodan Millosheviq, ishte akuzuar për krime lufte dhe për krime kundër njerëzimit, të kryera nga forcat serbe e jugosllave në Kosovë. Millosheviq ishte akuzuar për krime lufte dhe krime kundër njerëzimit të kryera edhe në luftërat në Bosnjë e Hercegovinë, si dhe në Kroaci.

Gjykimi i tij në Gjykatën ndërkombëtare penale për ish-Jugosllavinë (ICTY), me seli në Hagë, nuk kishte marrë epilog pasi Millosheviq kishte vdekur më 11.03.2006 në qeli teksa po mbahej në paraburgim.

Milan Millutinoviq, ish-kryetari i Serbisë, ishte liruar nga akuzat për krime lufte gjatë konfliktit në Kosovë.

Nikolla Shainoviq, zëvendëskryeministër i Republikës Federale të Jugosllavisë, ishte dënuar me 18 vjet burg për krime kundër njerëzimit dhe shkelje të ligjeve apo zakoneve të luftës.

Dragolub Ojdaniq, ish-shefi i Shtabit të Përgjithshëm të Ushtrisë jugosllave, ishte dënuar me 15 vjet burg për krime kundër njerëzimit.

Nebojsha Pavkoviq, ish-komandanti i Armatës së Tretë të Ushtrisë jugosllave, ishte dënuar me 22 vjet burg për krime kundër njerëzimit dhe shkelje të ligjeve apo zakoneve të luftës.

Vlladimir Llazareviq, ish-komandanti i Korpusit të Prishtinës të Ushtrisë jugosllave, ishte dënuar me 14 vjet burg për krime kundër njerëzimit.

Sreten Llukiq, ish-shefi i stafit të Ministrisë së Punëve të Brendshme të Serbisë për Kosovë, ishte dënuar me 20 vjet burg për krime kundër njerëzimit dhe shkelje të ligjeve apo zakoneve të luftës. /Kallxo.com/