Teatri i Qytetit “Bekim Fehmiu” nis projektin e ri eksperimental “Pa Titull”

Teatri “Bekim Fehmiu” në Prizren ka ndërmarrë një iniciativë të re artistike në bashkëpunim me regjisorin Kaltërim Balaj. Këtë herë, teatri laborator “Pa Titull”, parashihet që të sjellë një frymë të re në skenën teatrore, përmes një formati më inovativ, i cili eksploron format eksperimentale të artit skenik.

“Ka filluar projekti i ri teatror. Teatri laborator “Pa Titull,” një bashkëprodhim i teatrit tonë me regjisorin Kaltërim Balaj pritet të sjellë risi në skenën teatrore. Ky format i teatrit laborator, i njohur për qasjen eksperimentale dhe interaktive, sjell një përvojë ndryshe për aktorët dhe publikun”, thuhet në njoftimin e  Teatrit të qytetit “Bekim Fehmiu”.

Aty theksohet se projekti shkon përtej kufijve të zakonshëm të teatrit, meqë ofrohet një hapësirë e gjerë për liri krijuese kolektive.

“Në vend të një strukture klasike me skenar të përgatitur paraprakisht, teatri laborator synon eksplorimin nëpërmjet krijimit kolektiv”, vazhdon njoftimi.

Në të njëjtën kohë, ky është një nga projektet e para të këtij lloji në skenën teatrore të Prizrenit, që madje sfidon perceptimet tradicionale të teatrit.

“Risia e teatrit laborator qëndron në thellimin e procesit krijues, ku aktorët nuk janë vetëm interpretues, por bashkëkrijues”, thuhet në njoftim.

Prandaj, planet e organizatorëve janë që “Pa Titull” të ofrojë një përjetim frymëzues të artit.

“Teatri laborator sjell një frymë të re të eksperimentimit dhe inovacionit, duke i dhënë skenës sonë teatrore mundësinë për të eksploruar ide të guximshme dhe forma të reja të shprehjes artistike”, përfundon njoftimi i Teatri “Bekim Fehmiu” në Prizren.

Gjatë këtij viti, Teatri i qytetit ka vënë në skenë premierat e tri projekteve teatrore. Teatri laborator “Pa Titull” është projekti i katërt i nisur në vitin 2024.

Paralelisht me këtë, gjatë kësaj jave, Teatri “Bekim Fehmiu” në Prizren i ka bërë thirrje dramaturgëve vendorë që të aplikojnë për Contempora 2024, që sivjet zhvillon edicionin e dytë.

Ky teatër një javë më parë ka prezantuar premierën e dramës “Ping Pong dhe Dashuri” të autorit dhe regjisorit Butrint Pasha, që ishte shpallur fitues në Contempora 2023. /Telegrafi/