Komuna e Prizrenit nderohet me çmim ndërkombëtar për lehtësimin e zhvillimit të ndërmarrësisë

Komuna e Prizrenit është vlerësuar me një çmim ndërkombëtar për krijimin e mjedisit të favorshëm për zhvillimin e ndërmarrësisë, në ceremoninë e mbajtur në Mal të Zi.

Drejtori i Punës dhe Mirëqenies Sociale, Rasim Demiri ka njoftuar se në emër të kryetarit Shaqir Totaj ka pranuar çmimin e artë dhe mirënjohjen për punën e Komunës së Prizrenit në fushën e krijimit të një mjedisi dhe klime të mirë për zhvillimin e ndërmarrësisë në Evropën Qendrore dhe Juglindore “GlobalLocal”, raporton Telegrafi.

Ky çmim, sipas tij, jepet për rajonin e Evropës Qendrore dhe Juglindore sipas vendimit të Komitetit Ndërkombëtar të Pavarur për dhënien e çmimeve dhe mirënjohjeve nga Forumi Ndërkombëtar Ekonomik Perspektive, me mbështetjen e Kongresit Botëror të Ndërmarrësve.

Demiri ka bërë të ditur se Komuna e Prizrenit ka marrë këtë çmim në konkurrencë me qytete nga shtatë shtete, si Austri, Bosnjë dhe Hercegovinë, Mal i Zi, Kroaci, Maqedoni e Veriut, Slloveni dhe Serbi, në mesin e 89 kandidatëve, qyteteve dhe institucioneve.

“Komuna jonë ka marrë çmimin e artë si një nga tre komunat me këtë mirënjohje, në ceremoninë e mbajtur në Podgoricë dhe në Budvë, në prani të përfaqësuesve më të lartë të shtetit mikpritës dhe të rajonit, ministrave përkatës nga vendet e rajonit, përfaqësuesve të trupit diplomatik, dhe personaliteteve të tjera të nderuara dhe përfaqësuesve të organizatave joqeveritare nga Evropa Qendrore dhe Juglindore”, ka njoftuar Demiri në rrjetet sociale.

Ai ka shtuar se në kuadër të programit, ka folur edhe në panelin e Kongresit Botëror të Ndërmarrësve në Budvë, ku ka veçuar rëndësinë e ndërmarrësisë për zhvillimin ekonomik lokal si dhe për projektet e Komunës së Prizrenit që zbatohen për të krijuar kushte më të mira për zhvillimin e ndërmarrësisë, raporton Telegrafi.

“Çmime dhe mirënjohje të tilla në arenën ndërkombëtare janë një pasqyrim i përkushtimit tonë për të ndihmuar procesin e zhvillimit ekonomik në nivel lokal dhe Komuna e Prizrenit do të vazhdojë të mbështesë të gjitha bizneset që operojnë në komunën tonë dhe të krijojë një klimë edhe më të favorshme për zhvillimin ekonomik të qytetit tonë”, është shprehur drejtori Demiri. /Telegrafi/