Rriten çmimet e perimeve në tregun e Mitrovicës, qytetarët thonë se kjo është e papërballueshme

Në përgjithësi çmimet tashmë e një kohë kanë shënuar rritje dhe kjo është shumë shqetësuese për qytetarët, e çmimet e produkteve ushqimore janë ndër ato që janë rritur më së shumti.

Në tregun e Mitrovicës, këto çmime sipas qytetarëve, janë rritur jashtëzakonisht shumë dhe se sipas tyre, janë vështirë të përballueshme për standardin e tyre të jetesës, shkruan Telegrafi.

Një tregtar në tregun e Mitrovicës që donte të mbetej anonim për Telegrafin ka thënë se çmimet e produkteve, më saktësisht perimeve, nuk kanë ndryshuar fare në krahasim me vitin e kaluar.

Tregtari ka thënë se ka mjaft interesim nga qytetarët për blerje të këtyre perimeve, derisa tregon edhe çmimet e tyre.

“Një thes i vogël i specave i ka tre kilogramë dhe kushton katër euro, ndërsa thesi i madh i ka dhjetë kilogramë dhe kushton 18 euro. Çmimi i patateve nuk ka ndryshuar, ka mbetur pesë euro, thesi është 11 kilogramë. Trangujt vjet janë shitur pesë – shtatë euro, tash nëntë euro. Karotat kanë të njëjtin çmim, pesë kilogramë kushtojnë katër euro. Edhe lakrat kanë të njëjtin çmim, kushtojnë 80 cent”, ka treguar tregtari.

Por, tregtari me inicialet L.S. për Telegrafin ka thënë se çmimet e perimeve janë rritur edhe për shkak se temperaturat e larta gjatë verës kanë shkaktuar shumë dëme, por siç tha ai, ka edhe transport të tyre jashtë vendit.

“E kur ka mungesë të tyre normalisht që rritet çmimi sepse ka kërkesë më të madhe”, ka thënë tregtari me inicialet L.S.

Ai është shprehur se gjatë kohës së fundit po kanë shumë shitje, derisa ka theksuar se këto çmime nuk janë “edhe shumë të larta”.

Tregtari tjetër, Muharrem Syla, për Telegrafin ka thënë se çmimet e perimeve janë rritur për 30 për qind.

“Të gjitha çmimet e të gjitha perimeve këtë vit janë 30 për qind më të larta se vitin e kaluar. Shkaktar kryesor mund të jenë kushtet atmosferike, ka ndikuar nxehtësia e madhe, tash kohën e fundit ka pasur reshjet”, ka thënë Syla.

Syla ka thënë se edhe interesimi nga ana e qytetarëve tashmë është më i vogël krahasuar me vitet tjera, derisa është shprehur se edhe kualiteti i perimeve këtë vit është më i dobët.

“Këtë vit kualiteti i perimeve është më i dobët se sa në vitet paraprake”, ka theksuar tregtari në tregun e Mitrovicës.

Një qytetar që donte të mbetej për Telegrafin ka thënë se për të si një pensionist këto çmime janë të larta.

Qytetari është shprehur se perimet kanë kualitet. “Ka kualitet, nuk ka dallim me vitet tjera, janë cilësore”, ka thënë qytetari.

Një qytetare në kushte anonimiteti për Telegrafin ka thënë se çmimet e perimeve janë rritur dhe siç është shprehur ajo, ato rriten për çdo javë, transmeton Telegrafi.

Për të, këto çmime nuk janë fare të përballueshme.

“Këto çmime për ne nuk janë aspak të përballueshme, absolutisht jo. Bazuar në standardet tona këto çmime janë jashtëzakonisht të larta”, është shprehur ajo.

Qytetarja tjetër, Ariana Tahiri, për Telegrafin ka thënë se çmimet e perimeve këtë vit janë shumë të larta.

“Këtë vit çmimet janë tejet e larta”, ka thënë Tahiri, duke shtuar se produktet janë cilësore por kanë çmime të larta.

Ajo është shprehur se si një pensioniste që është këto çmime për të janë të papërballueshme. /Telegrafi/