U arrestua për lidhje me Mossad-in, Koci: Rexhepi po mbahet në burgun e Sigurisë së Lartë në afërsi të Stambollit

Shtetasi kosovar, Liridon Rexhepi u arrestua gjatë të martës nga autoritetet turke nën dyshimin se i njëjti menaxhonte rrjetin financiar të Mossad-it në Turqi.

Ai u arrestua nga Departamenti i Antiterrorit i Policisë së Stambollit.

Arianit Koci, avokati i Rexhepit i autorizuar nga familja e tij, ka thënë për Telegrafin se klienti i tij është duke u mbajtur në burgun e Sigurisë së Lartë në afërsi të Stambollit.

“Ai është duke u mbajtur në burgun e Sigurisë së Lartë të tipit të mbyllur në afërsi të Stambollit”, tha Koci.

Avokati shtoi se për shkak të ndjeshmërisë së rastit, për momentin nuk mund të ndaj më shumë informacione.

Koci gjithashtu theksoi se familja e Liridon Rexhepit, insiston se djali i tyre është i pafajshëm dhe se janë të gatshëm që të bashkëpunojnë me autoritetet kosovare dhe turke për të zbardhur rastin.

Rexhepi thuhet se ka transferuar para të cilat janë përdorur për mbledhje të informacioneve në Siri, për kryerjen e operacioneve psikologjike kundër palestinezëve dhe koordinimin e operacioneve që lidhen me dronët.

Raportohet se Rexhepi përdori shërbime për transferimin e parave për në Turqi.  Kur arriti në këtë shtet, paratë u shpërndanë tek operativët në terren, të cilët në këmbim, i dërguan këto para tek asetet në Siri, shpesh duke përdorur kriptovaluta për t’i realizuar këto transfere.

MIT ka përcaktuar se të gjitha lëvizjet e Rexhepit, veçanërisht lëvizjet e dyshimta në llogaritë e tij, janë monitoruar dhe ai ka bërë transfere të shumta parash për personelin në terren në Turqi nëpërmjet Western Union.

Aktivitetet e tij thuhet se janë monitoruar nga 25 gushti kur ai ka hyrë në Turqi. /Telegrafi/