Lajme

Ambasada amerikane e kritikoi për deklaratën e “kuvendit gjithëserb”, Vuçiq përgjigjet me akuza

Para 7 muajve

Presidenti i Serbisë, Aleksandar Vuçiq, i është përgjigjur deklaratës së Ambasadës së SHBA-së në Bosnjë dhe Hercegovinë, e cila tha se konkluzionet e miratuara në “kuvendin gjithëserb” në Beograd paraqesin sulm ndaj Dejtonit, duke e pyetur ambasadën se ku shkruhet në atë marrëveshje se prona i takon shtetit dhe jo entiteteve.

Vuçiq thotë se me Marrëveshjen e Dejtonit janë rregulluar kompetencat e autoriteteve qendrore dhe të entiteteve.

“Pyetja ime e parë për ta është se si, ku dhe që kur shkruan diku se prona është e autoriteteve qendrore dhe jo e entiteteve. Neni 3.3 i Kushtetutës së Bosnje dhe Hercegovinës, aneksi katër i Marrëveshjes së Dejtonit, përcakton se të gjitha funksionet shtetërore të autoritetit që nuk u janë caktuar shprehimisht institucioneve të Bosnje dhe Hercegovinës u përkasin entiteteve”, tha Vuçiq në një video në Instagram e tij, të adresuar, siç shkruan ai, për “aleatët amerikanë”.

Kështu ai iu përgjigj njoftimit të djeshëm të Ambasadës së SHBA-së në Bosnje dhe Hercegovinë, ku thuhet se “deklaratat publike të zyrtarëve të Republikës Srpska, veçanërisht të presidentit të Republikës Srpska, Milorad Dodik” për konkluzionet dhe planet për ndarjen e Republikës Srpska nga Bosnja e Hercegovina përfaqëson “një sulm ndaj Dejtonit dhe ndaj integritetit territorial, sovranitetit dhe karakterit multietnik të Bosnjës e Hercegovinës, transmeton Telegrafi.

Ambasada amerikane vuri në dukje se Marrëveshja e Paqes e Dejtonit dhe Kushtetuta e Bosnjës e Hercegovinës shprehimisht thonë se Bosnje e Hercegovina është shteti pasardhës i Republikës së Bosnjes e Hercegovinës me strukturën e saj të brendshme, të modifikuar, në mënyrë që të përbëhet nga dy entitete.

Në videon e postuar në Instagram, Vuçiq tha se neni 3.1 i Marrëveshjes së Dejtonit janë përmendur kompetencat e institucioneve të Bosnjës e Hercegovinë, por jo edhe prona publike.

“Prandaj ju lus partnerë të nderuar nga Ambasada Amerikane të më jepni një përgjigje konkrete se si keni ardhur në konkludim dhe mbi bazën e cilit akt dhe çfarë akti se prona është e autoriteteve qendrore dhe jo e entiteteve, siç shkruhet qartë në Marrëveshjen e Dejtonit, dhe pse ndër të tjera keni marrë pjesë në shkaktimin e krizës në territorin e Bosnjes e Hercegovinës. Në të njëjtën kohë, pres që të më përgjigjeni, siç e keni thënë në disa raste, se kjo ka të bëjë me marrëveshjen për trashëgimi të vitit 2001, e cila ka hyrë në fuqi në vitin 2004”, tha ai.

Vuçiq shtoi se trashëgimia rregullon të drejtat dhe detyrimet e shteteve anëtare të krijuara në territorin e Bosnjës e Hercegovinës, dhe jo mënyrën se si prona publike do të shpërndahet brenda një prej shteteve anëtare të krijuara nga shpërbërja e Republikës Socialiste Federative të Jugosllavisë, dhe se “është shumë i lumtur që Ambasada (SHBA) pranoi një diskutim të mirë të arsyetuar, të qytetëruar dhe pa asnjë ofendim” dhe se i gëzohet përgjigjes që pret.

Sipas vendimit të Gjykatës Kushtetuese së Bosnje e Hercegovinës, prona shtetërore paraqet sende të luajtshme dhe të paluajtshme që shërbejnë për ushtrimin e pushtetit dhe mund të përfshijë edhe të mira publike (lumenj, male, pasuri natyrore, infrastrukturë komunikacioni etj.)

Pronat shtetërore në Bosnje e Hercegovinë nuk kanë qenë në dispozicion prej vitit 2005, kur përfaqësuesi i lartë i atëhershëm në Bosnje e Hercegovinë, Paddy Ashdown, vendosi Ligjin për mos lënien në dispozicion përkohësisht të pronës shtetërore.

Ai është në fuqi derisa Asambleja Parlamentare e Bosnje e Hercegovinës të miratojë një vendim të ri për vënien në dispozicion të pronës në nivel shtetëror.

“Kuvendi gjithëserb” u mbajt më 8 qershor në Beograd, me pjesëmarrjen e përfaqësuesve të Qeverisë së Serbisë dhe të entitetit serb, Republika Srpska.

Ai u organizua nën sloganin “Një popull, një kuvend – Serbia dhe Srpska” dhe prodhoi të ashtuquajturën Deklaratë për mbrojtjen e të drejtave kombëtare dhe politike dhe të ardhmërisë së përbashkët të popullit serb. /Telegrafi/