Është shtyrë referendumi për largimin e lojërave të fatit në Tetovë

Nuk ka datë konkrete se kur do të mbahet referendumi për largimin e lojërave të fatit (kazinove) nga vendbanimet e Komunës së Tetovës. Nga Komuna presin të ulen në bisedë edhe njëherë me Lëvizjen Antibizhoz që të vendosin për këtë proces.

Ndërkaq, nga Lëvizja Antibixhoz theksuan se nuk kanë hequr dorë nga ky proces, por se e kanë prolonguar në mënyrë që të mendohen të gjitha detajet që referendumi të del i suksesshëm. Ata shtojnë se edhe klima politike nuk është e përshtatshme që referendumi të mbahet tani, shkruan Portalb.mk. Edhe pse kanë kaluar nëntë muaj që nga mbajtja e debatit publik ku u shpalos ideja nga Lëvizja Antibixhoz për inicimin e referendumit lokal për largimin e lojërave të fatit nga vendbanimet, data për të njëjtin nuk është caktuar ende. Besar Durmishi (kryetar i Këshillit të Komunës së Tetovës).

Kryetari i Këshillit Komunal të Tetovës, Besar Durmishi për Portalb.mk thotë se kanë qenë në komunikim me Lëvizjen Antibixhoz dhe të gjitha të gjitha obligimet që duhet t’i ndërmerr Komuna e Tetovës në lidhje me referendumin i ka ndërmarrë dhe është e përgatitur.

“Disa herë kam kontaktuar me ata i kam pyetur dhe ende nuk kam marrë përgjigje pozitive se kur do të ulemi që të takohemi dhe të diskutojmë rreth këtij procesi. Në qoftë se nuk do të kemi një hap të tillë, kemi një formë tjetër të cilën do duhet të ulemi bashkërisht me të gjithë këshilltarët komunal dhe mendoj se bashkërisht do të gjejmë zgjidhje përfundimisht do sjellim vendim ku do të jetë në shërbim të qytetarëve dhe do t’i mënjanojë kazinotë prej qytetit”, tha Durmishi, i cili shtoi se do të njoftojnë shumë shpejtë edhe për datë konkrete.

Nga Lëvizja Antibixhoz, Xhemal Abdiu për Portalb.mk në lidhje me referendumin theksoi se është e rëndësishme që komuna e përkrah këtë nismë, theksoi se ideja për referendumin vazhdon, por për disa çështje teknike e kanë prolonguar.

“Më konkretisht bëhet fjalë për censusin pasi për të qenë i suksesshëm një referendum është 50 përqind plus 1, ndërsa duke pasur parasysh se në zgjedhjet qoftë parlamentare apo lokale ky census nuk është edhe dalja në votime është maksimumi 40 përqind. Kështu që ne kemi caktuar takim me ministrin e Drejtësisë, presim përgjigje. Kjo u zgjat pak mirëpo për shkak të çështjeve dhe klimës së papërshtatshme politike, duhet të presim për një situatë pak më të qetë. Jemi të vendosur që së pari ne të bisedojmë për censusin, të zvogëlohet censusi që referendumi të jetë i suksesshëm, kjo është qëllimi se nuk dëshirojmë të dështojmë”, tha Abdiu. Ai tha se kjo shtyrje bëhet thjeshtë për shkak të klimës politike që është në vend. “Ideja qëndron por shtyhet për më vonë. Jemi të bindur që ajo do të ketë sukses mirëpo që ne duhet të marrim hapa shumë të sigurt, edhe pse ne jemi të gatshëm edhe me këtë census që të organizojmë referendumuin, por së pari do të mundohemi të zvogëlojmë këtë numër”, tha Abdiu.

Ndërkaq, referendumi do të përkrahet edhe nga këshilltarët e BDI-së në Këshillin Komunal. “Ne e kemi përkrahur edhe publikisht Lëvizjen Antibixhoz dhe nuk kemi asgjë kundër kërkesave të tyre . Tani i është lënë në dorë kryetarit të Komunës dhe udhëheqësisë së Komunës të vendos për datën dhe krijimin e referendumit për qytetarët e Tetovës”, tha Liridon Disha, këshilltar komunal.

Lëvizja Antibixhoz disa herë ka organizuar protesta për largimin e objekteve të lojërave të fatit nga vendbanimet, por pavarësisht ngritjes së zërit, autoritetet nuk i kanë zbatuar kërkesat e tyre. Ndryshe, propozim ligji për lojërat e fatit ku parashihet që hapësirat afariste, gjegjësisht vendet për pagesë në të cilat organizohen lojërat e fatit të jenë në largësi jo më pak se 500 metra nga shkollat fillore dhe të mesme është në procedurë parlamentare. Ky ligj, ngjalli reagime të shumta në opinion.