Ishin bllokuar në shpellën e Pëllumbasit në Tiranë, shpëtohen dy turistë francezë pas pesë orësh operacion kërkim-shpëtimi

Dy turistë francezë që kishin mbetur të bllokuar në vendin e quajtur “Gryka e Skoranës”, te shpella e Pëllumbasit janë shpëtuar nga policia e Tiranës.

Policia e Tiranës njofton se pas më shumë se pesë orësh kërkime, arritën të gjejnë dhe të shpëtojnë 2 turistët që kishin mbetur të bllokuar te Gryka e Skoranës afër “Shpellës së Pëllumbasit”, pa ujë dhe pa ushqim.

Para mesnatës, shërbimet e Policisë i gjetën të bllokuar në një zonë të thepisur, pasi kishin humbur orientimin gjatë eksplorimit të natyrës.

Pasi iu kanë dhënë ndihmën e parë, për shkak të terrenit te rrezikshëm, shërbimet e Policisë kanë kërkuar shërbime të specializuara për t’i nxjerrë në këmbë turistët nga vendi ku ishin bllokuar deri ku i priste ambulanca.

Dy turistët janë dërguar në spital dhe aktualisht ndodhen në gjendje të mirë shëndetësore.

Në ndihmë të tyre kanë shkuar Njësia Alpine e FNSH Tiranë dhe shërbime të Repartit Special RENEA, të cilët kanë ndërhyrë për nxjerrjen e turistëve nga vendi ku kishin mbetur të bllokuar dhe së bashku me shërbimet e tjera të Policisë i kanë shoqëruar me këmbë turistët, deri në vendin ku i priste ambulanca.