Një djalë 10-vjeçar u burgos pasi urinoi në ambient publik në Misisipi

Latonya Eason ishte në zyrën e një avokati në Senatobia, në jug të Memphis, për këshilla ligjore kur një polic i tha asaj se e arrestoi djalin e saj, Quantavious pasi ai e kishte kapur duke urinuar pas veturës së saj.

“Unë thashë, ‘Bir, pse e bëre këtë?’ Ai tha, ‘Mami, motra ime tha se nuk kanë banjë atje’”, tha Eason.

“Oficeri më tha se Quantavious mund të kthehej brenda veturës dhe se thjesht do t’i jepte një paralajmërim”, tha ajo, por më pas u shfaqën disa policë të tjerë, duke përfshirë një toger që tha se djali duhej të dërgohejj në burg.

Quantavious tha se ishte frikësuar kur polici e mori në pyetje, raporton nypost.

“Fillova të qaj pak. Më zbritën nga kamioni. Nuk e dija se çfarë po ndodhte”, tha ai për gazetën. “Kisha frikë. Fillova të dridhem dhe të mendoj se do të shkoj në burg”, tha ai.

Djali, i cili nuk u prangos, tha se ai u mbajt në një qeli dhe më vonë iu dorëzua nënës së tij.

Eason ka publikuar në rrjetet sociale një fotografi të djalit të saj në ulësen e pasme të një veture patrullimi. Kryepolici vuri në dukje se oficeri nuk e kishte parë prindin e tij në vendngjarje. /Telegrafi/