Drogë dhe armëmbajtje pa leje, tre të arrestuar në Korçë

Tre persona kanë rënë në prangat e policisë së Korçës pasi akuzohen për veprimtari kriminale në fushën e prodhimit dhe shitjes së narkotikëve, armëmbajtjes pa leje dhe kultivimit të bimëve narkotike.

Në kuadër të, operacionit policor të koduar “Denasi”, janë vënë në pranga shtetasit Donald Lato 24 vjeç, Klevis Zaçellari 20 vjeç dhe Luan Qazimi 38 vjeç.

Në bazë të informacioneve të siguruara nga inteligjenca informative se këta shtetas, në bashkëpunim me njëri-tjetrin, ushtronin veprimtarinë kriminale të prodhimit dhe shitjes së narkotikëve, shërbimet policore kanë ushtruar kontroll në banesat e tyre, në fshatrat Gjonomadh dhe Denas. Gjatë kontrolleve në të trija banesat, u gjetën sasi lënde të dyshuara narkotike kanabis.

Sipas policisë në afërsi të banesës së 24 vjeçarit u gjetën të kultivuar fidanë kanabis, ndërsa gjatë kontrollit në banesën e 20 vjeçarit , u gjetën 2 armë gjahu dhe 2 tyta çifteje.

Në cilësinë e provës materiale është sekuestruar një sasi lënde e dyshuar narkotike kanabis, 2 armë gjahu dhe 2 tyta çifteje, si dhe asgjësohen fidanë kanabisi që u gjetën të kultivuar afër një banese.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme. /Telegrafi/