Në Strugë gjithnjë e më pak filloristë, këtë vit janë regjistruar 77 fëmijë më pak

77 nxënës filloristë më pak në shtator do të ulen në njëmbëdhjetë shkollat fillore të Strugës krahasuar me vitin e kaluar, që do të thotë se tani do të ketë gjithsej 471 nxënës filloristë. Kjo do të thotë se do të ketë pesë deri gjashtë klasa më pak. Situata më e vështirë është në shkollat që gravitojnë rreth fshatit Delogozhdë.

“Në Shkollën fillore Qendrore në Delogozhdë janë regjistruar 7 filloristë, ndërsa vitin e kaluar ishin 19. Në fshatin Livadhi vitin e kaluar ishin 18, ndërsa tani janë vetëm 2. Në fshatin Poum ka vetëm një nxënës në klasë të parë, ndërsa në Xhepin, nuk ka asnjë. Në fshatin Koroshishtë, vitin e kaluar janë regjistruar 9, tani vetëm 7”, thonë nga Shkolla në Dellogozhdë.

Nga shkolla në Delogozhdë për Alsat thanë se sipas listave të tyre, numri i fëmijëve që duhej të regjistrohen në klasën e parë ishte më i lartë. Arsyeja për këtë thuhet të jetë migrimit. Xhemi Hajredini, njohës i sistemit arsimor në Strugë, thotë se kjo situatë ndikohet nga disa faktorë, si emigracioni, normat më të ulëta të lindjeve, por edhe kushtet e këqija ekonomike.

Ka shumë shembuj kur nxënësit braktisin shkollën në mes të vitit shkollor për shkak të shkuarjes jashtë vendit.

Edhe në shkollën fillore më të madhe në qytet, “Vëllezërit Milladinov”, ka një rënie të numrit të nxënësve të klasës së parë. Vitin e kaluar u regjistruan 84 filloristë me mësimin në gjuhën shqipe, ndërsa këtë vit ky numër është 66. Ulje ka edhe në klasat me mësim në maqedonisht dhe turqisht. Më e qëndrueshme është situata në fshatrat Radolishtë, ku nga 36 të vitit të kaluar tani janë 65 dhe në Veleshtë, ku nga 33 nxënës vitin e kaluar, tani janë regjistruar 36 nxënës. /Alsat.mk