Pronarët e një muzeu në SHBA hutohen nga “mumja misterioze”

Pronarët e një muzeu kanë mbetur të hutuar pas arritjes së një pakoje misterioze, që përmbante një figurë që dukej si një “hibrid mes një miu dhe një njeriu”.

Pakoja e çuditshme e “mirëpriti” stafin në Muzeun Historik të Qarkut Wayne në qytetin amerikan të Richmond, Indiana, kur ata arritën në punë të hënën e kaluar.

Brenda kishte diçka që i ngjante një “mumjeje” me një kokë që i përngjante një miu, një trup humanoid dhe dhëmbë dhe kthetra të mprehta, shoqëruar nga një shënim, raporton Mirror, transmeton Telegrafi.

Brenda shënimit thuhej se figura në fjalë ishte “Djaloshi Mi nga Richmond”, dhe se ishte gjetur para shumë kohësh në podrumin e një spitali të zonës, teksa ajo i përkiste një shokut të gjyshit të personit që e kishte dhuruar “mumjen” tek muzeu.

Menaxherja e sektorit të koleksioneve Kerry George tha: “Bashkëpunëtori im e solli brenda që ta hapja. Ne bënim shaka se ndoshta ishte një kokë e prerë – pasi që të gjithë shohim shumë filma horror”.

“Lexova shënimin që ndodhej brenda kutisë, falënderues që kisha të paktën disa informacione për përmbajtjen, vura disa doreza nitrili – sepse nuk e dini kurrë se çfarë ka aty – dhe e hapa. Brenda saj kishte disa gazeta të vjetra që ishin përdorur si mbushje, të cilat datonin nga viti 2019”, shtoi ajo.

“Koka e Djaloshit Mi ishte gjëja e parë që pashë dhe fillimisht mendova se ishte një copë taksidermie e tmerrshme. Kur nxora pjesën tjetër të gazetës, ai ishte aty me gjithë lavdinë e tij”, deklaroi ai.

Stafi i muzeut mendon se artefakti është ndoshta një “gaf” – një kriptid që u fabrikua si një atraksion, si e ashtuquajtura Sirena nga Fixhi e ekspozuar dikur nga P.T. Barnum. /Telegrafi/