Temperaturat mesatare mund të arrijnë shifra rekorde këtë vit

Aktivistët e ndryshimeve klimatike u mblodhën dje para Parlamentit të Britanisë së Madhe përpara Ditës së Tokës për të nxitur veprime kundër ngrohjes globale dhe për të shmangur një të ardhme distopike, ndërsa vullnetarë në mbarë botën përgatiteshin për të mbjellë pemë dhe të pastrojnë mbeturinat.

Dita e Tokës sivjet pason disa javë të kushteve ekstreme të motit me temperatura të larta rekord në Tajlandë dhe një valë të tmerrshme të të nxehtit në Indi, ku të paktën 13 persona vdiqën nga goditja e nxehtësisë fundjavën e kaluar, shkruan reuters.

Klimatologët paralajmërojnë se temperaturat mesatare globale mund të arrijnë nivelin më të lartë të të gjitha kohërave në 2023 ose 2024, transmeton Telegrafi.

“Ndikimet klimatike janë këtu”, tha Areeba Hamid, bashkë-shefe ekzekutive e Greenpeace në Mbretërinë e Bashkuar.

Lexo po ashtu Autoritetet tajlandeze paralajmërojnë për nxehtësi ekstreme - Bangkok deri në 54 gradë Celsius

Hamid tha se kur ajo viziton qytetin e saj të lindjes, New Delhi, ndihet sikur “ka futur kokën në furrë” dhe se vala e të nxehtit në Londër në vitin 2022 ishte si një “film distopian”, duke thënë se “ne nuk mund ta përballojmë më këtë”.

Aktivistët e udhëhequr nga grupi Extinction Rebellion u mblodhën në Londër për të filluar një aksion katër-ditor të quajtur “The Big One”, i cili përkoi me Ditën e Tokës.

Rreth 30 mijë njerëz u regjistruan për mitingje dhe marshime familjare, duke shënuar një ndryshim në strategjinë për një grup të njohur për taktikat përçarëse, duke përfshirë bllokimin e rrugëve, hedhjen e ngjyrës dhe thyerjen e dritareve.

Globalisht, ka pasur një stuhi aktivitetesh përpara Ditës së Tokës, me ngjarje të planifikuara në Romë dhe Boston dhe fushata të mëdha për të pastruar liqenin Dal në Srinagar të Indisë dhe Kepin Coral të goditur nga uragani në Florida.

Në Peru, shamanët bënë një sakrificë për “Pachamama”, ose Nënën Tokë, të premten. Duke mbajtur lule të verdha dhe zhurmues, ata ecnin rreth një topi “papier-mache” ndërsa kryenin një ritual pastrimi.

Ritualet stërgjyshore – origjina e të cilave qëndron në kulturat indigjene të Perusë – kryhen për të falënderuar Tokën dhe rritin ndërgjegjësimin për planetin, tha Walter Alarcon, president i Organizatës Ndërkombëtare të Shërimit të Shamanëve të Perusë.

Lexo po ashtu Pluhuri, si një mburojë diellore për të ngadalësuar ngrohjen globale

Në fillim të kësaj jave, presidenti i SHBA-së, Joe Biden u zotua të rrisë fondet për të ndihmuar vendet në zhvillim të luftojnë ndryshimet klimatike dhe të frenojnë shpyllëzimin në pyjet tropikale të Amazonës në Brazil gjatë një takimi me liderët kryesorë botërorë.

Qeveritë kanë dështuar në përmbushjen e premtimeve sipas “Marrëveshjes së Parisit” të vitit 2015 për të kufizuar rritjen e temperaturave duke devijuar lëndët djegëse fosile, mes krizave duke përfshirë COVID-19, pushtimin e Rusisë në Ukrainë, mungesat e ushqimit dhe lidhjet e tensionuara midis Kinës dhe SHBA-së.

Një raport i Panelit Ndërqeveritar të OKB-së për Ndryshimet Klimatike (IPCC) thotë se planeti është në rrugën e duhur për t’u ngrohur me më shumë se 1.5 gradë Celsius në krahasim me kohërat para-industriale – një prag kyç për ndikime edhe më të dëmshme midis 2030 dhe 2035.

“Dritarja e mundësisë për të siguruar një të ardhme të qëndrueshme për të gjithë po mbyllet shpejt”, tha IPCC. “Zgjedhjet dhe veprimet e ndërmarra në këtë dekadë do të kenë një ndikim tani dhe për mijëra vjet”. /Telegrafi/