Ish-deputeti i Partisë Socialiste në Shqipëri, Spartak Braho deklaroi se në krye të Shërbimit Informativ të Shtetit do të duhej të ishte një shtetas shqiptar.
Ai i ka uruar punë të mbarë Vlora Hysenit, por është shprehur se e kundërshton emërimin e saj në krye të SHISH-it për shkak të parametrave ligjor.
Hyseni është shtetase kosovare e njohur si ish-zëvendësdrejtorja e Agjencisë së Kosovës për Inteligjencë. Ajo është shkarkuar nga ky post në vitin 2021. Hyseni ka qenë edhe këshilltare e Ramës së fundmi.
Megjithatë, Braho është kundër emërimit të saj dhe thotë se nuk e ndryshon këtë qëndrim.
“Unë pata një prononcim ligjor në të cilin e kundërshtoj emërimin për shkak të parametrave ligjor që unë sot e kësaj dite mbaj qëndrimin, Shefi i shërbimit Informativ duhet të jetë shqiptar 24 karatë. është shef i shërbimit, janë të gjitha sekretet. Vendin duhet ta dojë me shpirt. Ajo mund të jetë vajzë, grua shumë e mirë, por thonë se është edhe shtetase kosovare edhe shtetase shqiptare”, tha ai për Euronews Albania.
“Ligji thotë fjalë për fjalë që shefi i zbulimit duhet të jetë shtetas shqiptar. Është ecur me logjikën që deri sa është shtetas shqiptar edhe shtetasit kosovarë nuk përjashtohen. Do e shikojmë në punë e sipër, i urojmë punë të mbarë”,-tha Spartak Braho.
Më 3 prill, presidenti i Shqipërisë, Bajram Begaj dekretoi emërimin e Vlora Hysenit si drejtoreshë të Shërbimit Informativ të Shtetit.
Vlora Hyseni ishte në krye të institucionit më të lartë të sigurisë dhe inteligjencës në Kosovë që nga dhjetori i vitit 2020, kur ishte shkarkuar drejtori Kreshnik Gashi, deri në prill të vitit 2021, kur në detyrën e drejtorit ishte emëruar Petrit Ajeti.
Në shkurt të vitit 2019, Vlora Hyseni ishte emëruar zëvendësdrejtoreshë në Agjencinë e Kosovës për Inteligjencë. Paraprakisht, ajo ishte drejtoreshë për marrëdhënie me jashtë në AKI.
Presidentja Kosovës, Vjosa Osmani dhe kryeministri, Albin Kurti, më 30 qershor të vitit 2021 e kishin shkarkuar nga detyra Hysenin.
Presidenti Bajram Begaj dekretoi në 23 dhjetor 2022 lirimin nga detyra të drejtorit të Shërbimit Informativ i Shtetit, Helidon Bendo, i cili ishte emëruar në detyrën e drejtorit të Shërbimit Informativ të Shtetit në datën 5 nëntor 2018.
SHISH është institucion qendror që varet nga Kryeministri dhe drejtohet nga Drejtori.
Veprimtaria e SHISH-it bazohet në Kushtetutën e Republikës së Shqipërisë dhe në legjislacionin në fuqi.
Drejtori dhe zëvendësdrejtori i SHISH-it emërohen nga Presidenti i Republikës, me propozim të Kryeministrit. Struktura dhe organika e SHISH-it propozohen nga Drejtori dhe miratohet nga Kryeministri. Parimet bazë të punës së këtij institucioni janë ligjshmëria, objektiviteti dhe sekreti.
Nga PlanB
Nga Telegrafi Jobs
Nga CITY College
