Volkswagen Golf 8 GTI i blinduar nga Armormax, i reziston breshërisë së plumbave të revoleve dhe pushkëve

Kompania jugafrikane e specializuar në blindimin e veturave e quajtur Armormax, ka zhvilluar pakon për Volkswagen Golf GTI të gjeneratës së tetë.

Armormax Golf GTI mund t’i rezistojë breshërisë së plumbave të revoleve dhe pushkëve të ndryshme, e kjo nuk është hera e parë që kompania jugafrikane demonstron aftësitë e saj në një veturë interesante, pasi vitin e kaluar shiti Jaguarin e parë të blinduar I-Pace, transmeton Telegrafi.

Gjithashtu në historinë e projekteve figuron edhe Golf 7, por kësaj radhe pakoja peshon në total 179.6 kilogramë më shumë, kurse nga Armormax thonë se kjo nuk ndikon në shpenzimin e karburantit dhe performansës.

Një fakt tjetër interesant është që prodhimi final nuk zbulon faktin që bëhet fjalë për veturë të blinduar. Nga kjo kompani pretendojnë se Golf GTI është hatchbaku më “i sigurt me performansa tejet të larta.

Armormax ka dizajnuar pakon e saj për Golf GTI sipas standardit evropian B4, që do të thotë se mund t’i rezistojë breshërisë së plumbave siç janë revolet dhe pushkët e ndryshme.

Niveli B5 nënkupton mbrojtje nga pushkët automatike si AK-47, derisa niveli B6 nënkupton mbrojtjen nga pushkët e kalibrit të madh.

Standardi B7 është më i larti nivel në Evropë që i bën ballë goditjeve të armëve edhe më të rënda.

“Tetëshja” e parë e blinduar është e pajisur më së miri në familjen e Golfit, dhe kushton 106.830 dollarë. Atë e vë në lëvizje motori 2 litërsh TSI që prodhon 241 kuaj-fuqi. /Telegrafi/