Musliu: Kurti është deformuar fizikisht nga rrahjet në Burgun e Pozharevcit

Gazetari e publicisti Fahri Musliu, ka komentuar spekulimet dhe konspiracionet rreth gjykimit të Albin Kurtit në kohën derisa ka qenë i burgosur politik në Burgun e Pozharevcit në Serbi.

Ai krejt këto i ka quajtur “trillime të ulëta” ndaj një njeriu “që është fizikisht i deformuar nga dhuna serbe e ushtruar mbi të”.

“Të akuzosh njeriun që është në burg, që ka përjetuar dajakun si shtazë, që është deformuar prej dajakut… A e ke pa si ecën Albini? Dhe t’i thuash atij se ai gjatë kohës së luftës ka qenë me vajzën e Sokoloviqit në Klinë, kjo është një imagjinatë e çuditshme. Unë habitem prej nga vjen”, është shprehur Musliui në emisionin “FAKTE me Adnan Merovcin” në Klan Kosova.

Ai gjithashtu tha se Albin Kurti nuk kishte dhënë intervistë pas lirimit nga burgu i Pozharevcit, por ai ishte marrë me zor nga Policia dhe Kryqi i Kuq.

“Unë kam reaguar për të, me fakte. I them datën kur është arrestuar, ku ka qenë në burg. Tash ia shohin për të madhe pse ka dhënë deklaratë për mediat e huaja. Nuk ka dhënë deklaratë. Kryqi i Kuq Ndërkombëtar ka organizuar vizitën e ministrit të Drejtësisë së Serbisë, Jankoviqit, në Burgun e Pozharevcit, kanë qenë jashtë ata, dhe gazetarët e pyesin dhe Albini që është i tillë, që flet, e di anglishten, është përgjigjur, nuk është intervistë”.

“Intervistën ma ka dhënë mua në vitin 2001, në burg, me kërkesën time ndaj ministrit të Drejtësisë së Serbisë, Batiqit me lejen e Gjingjiqit dhe unë kam shkuar në Qupri, kam bërë intervistë me Albinin. Këto për mendimin tim janë bukur të ulëta. Albinin kanë shkuar e kanë marrë me zor Policia dhe Kryqi i Kuq, nuk ka dashtë me dalë Albini. Albini ka thënë nuk dal pa shokët e mi”, tha Musliu.