Përfundon mbledhja e Kryesisë së BDI-së, Ahmeti: Nuk është folur për lëvizje ministrash

Pas 10 orë debat, ka përfunduar mbledhja maraton e Bashkimit Demokratik për Integrim. Në përfundim të takimit ka folur zëdhënësi i kësaj partie, Bujar Osmani, ku tha se takim ka qenë konstruktiv dhe se është bërë një analizë e gjatë pune e ekzekutivit dhe shtoi se takimi i radhës do të jetë më 19 nëntor.

”U dakorduam që të vazhdojmë ta shterim debatin më 19 nëntor edhe me diskutuesit tjerë, kështu u përgjigj zëdhënësi i BDI-së, Bujar Osmani pas mbledhjes 10 orëshe të Kryesisë së BDI-së në Reçicë të Vogël. Osmani tha se mbledhja u zhvillua kryesisht në atmosfere pozitive.

“Debati ishte konstruktiv, nuk u arrit që të shteret në të gjithë diskutantët ose diskutuesit për shkak se Kryesia e re ka rreth 34 anëtarë, kështu që mbledhja do të vazhdojë më 19 nëntor”, tha mes tjerash Osmani.

Ndërsa zëvendëskryeministri, Artan Grubi, tha se BDI-ja është një akademi politike duke mos dhënë detaje të tjera rreth takimit 10-orësh.

Në fund fare është deklaruar edhe kryetari i BDI-së, Ali Ahmeti, ku tha se gjatë mbledhjes janë analizuar raportet e ministrave, ku kanë qenë të përfshira të gjitha çështjet. Ai tha se janë caktuar tre anëtarë që do të bëjnë redaktimin e raportit dhe më 19 nëntor do të vijojë sërish debati për të gjitha fushat. Ahmeti tha se debati ka qenë në frymë konstruktiveve, sidomos projektet që kanë të bëjnë me infrastrukturën dhe ekonominë e shtetit. Ai shtoi se tani e tutje do të ketë debate të vazhdueshme në parti, si takimi i sotëm.

Ahmeti hodhi poshtë se gjatë mbledhjes është folur për ndryshime të ministrave apo për lëvizje të tyre, duke përmendur edhe njëherë pikat e rendit të ditës që janë diskutuar në këtë mbledhje maraton.