Shkencëtarët pasi analizuan asteroidin: E dimë se nga ka ardhur ndoshta uji në Tokë

Uji mund të ketë ardhur në Tokë nëpërmjet një asteroidi nga skaji i jashtëm i sistemit diellor, thanë shkencëtarët pas analizimit të mostrave të rralla të mbledhura gjatë misionit gjashtëvjeçar japonez në hapësirë.

Në kërkim të përgjigjeve të pyetjeve rreth origjinës së jetës dhe krijimit të universit, shkencëtarët po përpunojnë materialin e sjellë në Tokë në vitin 2020 nga asteroidi Ryugu.

5.4 gram shkëmbinj dhe pluhur u mblodhën nga sonda hapësinore japoneze Hayabusa-2, e cila u ul në trupin hapësinor dhe lëshoi një “ndikues” në sipërfaqen e tij.

Hulumtimet e kryera mbi atë material kanë filluar të publikohen dhe në muajin qershor një grup shkencëtarësh thanë se kishin gjetur material organik, gjë që tregon se disa aminoacide, vetë fillimet e jetës, mund të kenë origjinën në hapësirë.

Në hulumtimin e ri, të botuar në revistën Nature Astronomy, shkencëtarët thonë se mostrat nga Ryugu mund të shpjegojnë se si u formuan oqeanet në Tokë miliarda vjet më parë, raporton cbsnews.

“Asteroidët e tipit C, të cilët janë plot me materiale të paqëndrueshme dhe organike, mund të jenë një nga burimet kryesore të ujit në Tokë”, sipas hulumtimit të shkencëtarëve nga Japonia dhe vende të tjera të botuar të hënën.

“Ardhja e substancave të paqëndrueshme (organike dhe të ujit) në Tokë është ende një temë debati”, pohon hulumtimi.

Por materiali organik i gjetur “në grimcat Ryugu, të identifikuara në këtë hulumtim, ndoshta përfaqëson një burim të rëndësishëm të substancave të paqëndrueshme”.

Shkencëtarët supozojnë se ky material ka të ngjarë të ketë origjinën “nga jashtë sistemit diellor”, por se “nuk ka gjasa që ai të ishte burimi i vetëm i substancave të paqëndrueshme që erdhi në Tokë në fillimin e tij”.

Hayabusa-2 u nis në vitin 2014 në një mision në Ryugu, rreth 300 milionë kilometra larg, dhe u kthye në orbitën e Tokës 2 vjet më parë për të hedhur një kapsulë mostër.

Në një studim në revistën Nature Astronomy, shkencëtarët përsëri përshëndetën zbulimet e bëra të mundshme nga misioni.

“Grimcat Ryugu janë padyshim një nga materialet më të pastra nga Sistemi Diellor që kemi për kërkime laboratorike, dhe ekzaminimi i këtyre mostrave të vlefshme sigurisht që do të zgjerojë të kuptuarit tonë për procesin e zhvillimit të Sistemit Diellor”, thuhet në studim. /Telegrafi/