Mate Rimac tregon në detaje se si bëhet prodhimi i Nevera – të gjitha proceset e sofistikuara që nevojiten kur ndërtoni një “hipermakinë”

Pas pesë vitesh zhvillimi dhe testimi, tri faza zhvillimi, 18 prototipe të prodhuara, 45 teste përplasjeje, homologimi evropian dhe amerikan i përfunduar me sukses dhe më shumë se 1.6 milion orë kërkimi dhe zhvillimi, modeli i parë i prodhimit të Rimac Nevera është hedhur në treg nga një linjë prodhimi në uzinat Rimac në Jankomir të Zagrebit në Kroaci, njoftoi kompania.

Kopja e parë, shtojnë ata, (numri serial #000) do të mbetet në pronësi të Bugatti Rimac, ndërsa kopjet e para janë të destinuara për klientët tashmë në fazën e avancuar të prodhimit në linjën e prodhimit, shkruajnë mediat kroate, përcjell Telegrafi.

Sipas tyre, ritmi i prodhimit është në rritje, deri në kapacitetin e planifikuar prej 50 njësi në vit, të cilat do t’u dorëzohen klientëve në të gjithë botën.

Makinat e para të destinuara për dorëzim te klientët tashmë janë duke u montuar, sipas Rimac Automobili, ku secila Nevera merr 5 javë në linjën përfundimtare të montimit, ndërsa shumë nga pjesët dhe sistemet e saj janë prodhuar muaj më parë në objektet e Rimac.

Dhe në një video të publikuar së fundmi, Mate Rimac na çon në procesin e zhvillimit të prodhimit të parë Nevera, përcjell Telegrafi.

Aty ju mund të shini të gjitha procedurat dhe proceset e sofistikuara që nevojiten kur bëni një hipermakinë.

Ato së shpejti do të dërgohen në mbarë botën përmes rrjetit global të 25 partnerëve zyrtarë të distributorëve të Rimac, që shtrihen në të gjithë Shtetet e Bashkuara, Evropë, Lindjen e Mesme dhe Azi.

Për të arritur objektivat jashtëzakonisht të larta të performancës që ekipi vendosi për Nevera, të gjithë komponentët kryesorë duhej të zhvilloheshin posaçërisht për Nevera, thuhet më tej.

Dhe procesi i zhvillimit dhe homologimit ishte sfidues për të gjithë ekipin, thotë kompania.

Duke filluar me prototipet eksperimentale, 18 prototipa Nevera u testuan me kujdes në çdo mjedis të imagjinueshëm dhe aspekt të matshëm, nga Rrethi Arktik deri në një dhomë klimatike me lagështi të lartë 48°C.

Një program rigoroz katër-vjeçar i provës së përplasjes rezultoi në shkatërrimin e nëntë makinave në 45 teste të ndryshme përplasjeje – të gjitha të cilat Nevera i kaloi me nota të shkëlqyera për t’i lejuar klientët të përjetojnë dhe të zotërojnë Nevera në të gjitha tregjet kryesore në mbarë botën.

Mate Rimac, themeluesi dhe CEO i Rimac Group, tha: “Në fillim të projektit Nevera, ne kryem mijëra simulime virtuale dhe eksperimentuam me përsëritje të dizajnit përpara se të vinte koha për të krijuar prototipet e para. Në atë kohë në kompani punonin rreth 300 veta dhe tani që po hyjmë në prodhim të plotë, kompania jonë është pesëfishuar dhe ka më shumë se 1500 kolegë, ndërkohë që po ndërtohet kampusi ynë i ri Rimac prej 100.000 m²”.

Siç thuhet në njoftimin për shtyp, Rimac Nevera ka vendosur standarde të reja për performancën e veturave.

Katër motorë elektrikë prodhojnë 1914 kuaj fuqi dhe e “shtyjnë” makinën nga 0 në 100 km/h në vetëm 1,9 sekonda dhe në 160 km/h (100 mph) në 4,3 sekonda. /Telegrafi/