Clark në Kosovë, me kryeministrin Kurti biseduan për energjinë, jo edhe për sigurinë

Gjenerali amerikan në pension, Wesley Clark, ka thënë se me kryeministrin Albin Kurti ka folur vetëm për projekte energjetike, me theks të veçantë për energjinë solare.

Ai pas takimit me shefin e qeverisë kosovare tha se nuk kanë biseduar për sigurinë në Kosovë dhe rajon.

“Ne folëm për zhvillimin e energjisë në Kosovë. Diskutuam vetëm se sa shpejt mund të sjellim energjinë solare, e dimë se është koha që të gjitha vendet në juglindje të Evropës të largohen nga përdorimi i energjive që emetojnë karbon dhe ta zhvillojnë energjinë solare sa më shumë që është e mundur”, ka thënë Clark për Klan Kosovën.

Ish-komandanti i NATO-s konfirmoi se nuk është këshilltar special i ministrit të Mbrojtjes Armend Mehaj, me të cilin gjithashtu është takuar, por vetëm një mik i tij.

“Unë nuk jam këshilltar special, jam veç një mik. Unë mund ta këshilloj këdo, nuk ka ndonjë caktim të veçantë”.

Clark ka deklaruar se ministri Mehaj dhe kushdo mund ta thërrasë dhe t’i tregojë se si po shkojnë gjërat, duke shtuar se nuk është marrë me diçka në veçanti në Ministrinë e Mbrojtjes.

Wesley Clark udhëhoqi fushatën e bombardimeve të NATO-s 23 vjet më parë mbi caqet ushtarake dhe policore serbe.