101-vjeçari bëhet me diplomë të shkollës së mesme

Një burrë 101-vjeçar, i cili duhet ta linte shkollën e mesme në Virxhinia Perëndimore në vitet 30-ta, u bë me një diplomë më shumë se 80 vjet më vonë.

Sipas medieve të huaja, përcjell Telegrafi, “Jefferson County Schools” në Virxhinia Perëndimore, tha se Merrill Pittman Cooper, 101-vjeç, kishte ndjekur Kolegjin Storer, një ish-shkollë e mesme në qytetin Harpers Ferry, por atij iu desh ta braktiste shkollën gjatë vitit të tij të fundit në vitin 1938 kur ai dhe nëna e tij u zhvendosën në Filadelfia për arsye financiare.

Cooper shprehu keqardhjen që nuk u diplomua kurrë gjatë një vizite në vitin 2018 në ish-kampusin e Kolegjit Storer, duke i shtyrë të afërmit të kontaktojnë distriktin shkollor “Jefferson County Schools”.

Këto përpjekje arritën kulmin këtë muaj kur Cooper-it iu dha një diplomë nderi nga Jefferson County Schools në një ceremoni diplomimi ku mori pjesë familja e tij.

“Jefferson County Schools është i përkushtuar të ndihmojë çdo student, të ri apo të vjetër, të përmbushë ëndrrat e tij”, tha mbikëqyrësi i këtij distrikti, Bondy Shay Gibson-Learn.

“Për zotin Cooper, kjo do të thotë që ai të bëhet me diplomë të shkollës së mesme. Ne jemi të nderuar të ndihmojmë që kjo ëndërr të bëhet realitet”. /Telegrafi/