Sindikata e punëtorëve social kërkon kushte të punës dhe staf profesional

Qendrat për Punë Sociale në Kosovë, përbëhen nga punëtorë të cilat disa prej tyre kanë kryer studime edhe në histori e administratë publike.

Përveç studimit jo adekuat për të trajtuar rastet e dhunës në familje, përdorimit të lëndëve narkotike Sindikata e Punëtorëve Social po kërkon që të shtohet stafi profesional dhe jo të dërgohen nga komunat njerëz që nuk janë kompetentë.

Për të gjitha këto kërkesa e edhe të tjera, Sindikata e punëtorëve social nesër ka planifikuar që të mbajë një aktivitet sensibilizues në sheshin “Skënderbeu” në Prishtinë duke filluar nga ora 11.

Kryetarja e sindikatës, Dashurije Ahmeti ka thënë në një prononcim për ‘Kallxo‘ se Qendrat për Punë Sociale po konsiderohen si kontejnerë.

“Komunat, Qendrën për Punë Sociale e shohin si një kontejner të bërllokut, çka të mbet nga administrata thonë hajt qoje te QPS sepse qaty në një far mënyre e rehatojnë. E kemi ngrit këtë çështje vazhdimisht”, thotë Ahmeti.

Ajo shton tutje se punëtorët social përballen me rrezikshmëri në vendin e punës e madje nuk marrin mbështetje sigurie.

“Kemi rrezikshmëri në vendin e punës, për shembull kur na thërret policia ne nuk mbrohemi nga kurrkush, kur kemi dhunë në familje shkojmë në polici dhe kemi rrezik askush nuk na përcjell në rrezikshmëri. Nuk kemi as shofer në dispozicion me na dërgu në raste, neve na duhet me i marrë veturat private me dalë në raste kur na thërrasin”, vazhdon të tregoj tutje Ahmeti.

Ahmeti përmend problemin edhe te ruajtja e informacioneve brenda institucionit. Ajo shton se punësimet e punëtorëve jo adekuat në QPS-të në Kosovë rrezikojnë ruajtjen e informacioneve.

“Kemi staf profesional por nuk është i mjaftueshëm. Stafi profesional nënkupton ofrimin e shërbimeve profesionle për shembull kemi një rast të dhunës në familje duhet me ju qas problemit në thelb, punëtori profesional nuk e shpërndan informacionin për dallim nga stafi tjetër që na vjen.  Te stafi profesional ka ma shumë përgjegjësi. Punëtorët duhet me qenë të kualifikuar për punë në bazë të kritereve”, tregon ajo.

Këto kërkesa dhe disa të tjera, Dashurije Ahmeti thotë se i kanë ngritur edhe në Asociacionin e Komunave të Kosovës.

Madje asociacionit, Ahmeti thotë se i kanë dërguar një kërkesë për takim por ende nuk kanë marrë përgjigje.

“I kemi ngrit te Asociacioni i Komunave sepse aty janë krejt kryetarët e komunave që mblidhen herë pas herë dhe i shqyrtojnë problemet herë pas here.  Kemi kerku me anë të një shkrese javën e kaluar me u taku me kryetarët e komunave, kemi kërku nga ana e tyre që mos me dërgu njerëz që nuk janë profesional që nuk janë të trajnuar që nuk dinë me trajtu raste të ndryshme”, tregon Ahmeti.

Sipas saj dërgimi i punëtorëve që kanë kryer, historinë, gjeografinë e administratë publike në studime nuk mund të qasen në mënyrën më të mirë ndaj një rasti.

“Me të ardh një historian dhe me tu qas në aspektin emocional të një nane apo fëmije, ai tërë studimin e ka bërë rreth ngjarjeve historie dhe vjen ulet me një nanë që për shëmbull me vite ka ushtruar dhunë, ai nuk ka fushë studimi edhe ndonjëherë mundet me dëmtu aq shumë dhe me rikthy atë nanë është problem. Është dashtë disa herë me ua tërheq rastet sepse e kemi pa që po e dëmtojnë rastin”, tregon Ahmeti.