Shfaqje për mbamendje në natën përmbyllëse të ‘Prishtina International Vocal Fest’

Programi i bollshëm dhe talentët e shumtë për publikun ishin dhurata më e bukur e Festivalit

Kori i Fakultetit të Arteve të Universitetit ‘’Haxhi Zeka’’ në Pejë edhe një herë gëzoi të gjithë adhuruesit e muzikës vokale që morën pjesë në koncertin e mbrëmjes së djeshme në kishën katolike ”Shën Ndou”, Prishtinë.

Me një energji pozitive që transmetohet në çdo moment, nën ritmin e duarve të shkathëta dhe të vendosura të dirigjentit Prof. Hyseni Nimani, Martina Lekaj, soprano dhe Besart Shalës, piano, kori solli një laramani veprash të kompozitorëve shqiptar dhe atyre të huaj, transmeton Telegrafi.

Kjo trupë korale e shquar për disiplinën artistike dhe përkushtimin, i ka kushtuar rëndësi të veçantë këtij koncerti dhe kanë punuar më shumë përkushtim për këtë paraqitje.

Ngrohtësia e tyre, fokusi në bukurinë e interpretimit, komunikimi me publikun që është kurora e koncerti, ishte mesazhi më i mirë që përçohet te artdashësish përmes një energie të madhe.

Koncerti i korit ishte një lloj uverture për sezonin ambicioz në të cilin sfida më e madhe sigurisht që do të jetë pjesëmarrja në vazhdimësi para publikut edhe përtej kufijve.

Përmes katër mbrëmjeve mjaft të këndshme për publikun, ky festival synon të kthejë vëmendjen pikërisht nga kjo muzikë por edhe nga koret, ansamblet, solistët dhe dirigjentët shqiptarë që gjejnë strehë në muzikën vokale.

Në përfundim të këtij festivali mbresëlënës të gjithë u larguan me përshtypjet më të mira, me më shumë miq dhe me shpresën për t’u takuar përsëri në aktivitete të tilla në të ardhmen.

/Telegrafi/