Shtyhet festivali “FemArt”, për shkak të përkeqësimit të situatës me pandeminë në Kosovë

Festivali Ndërkombëtar për artiste dhe aktiviste “FemArt” ka njoftuar se për shkak të situatës me pandeminë në vend është shtyrë për datën 1-6 tetor.

Masat e reja në Kosovë dhe situata e përkeqësuar me versioni Delta të pandemisë Covid-16, thuhet të jenë arsyet që kanë bërë që ky festival të mos mbahet në datat e planifikuara më parë.

Tutje, në njoftimin e festivalit në faqen e tyre zyrtare në Facebook, njoftuan publikun se “FemArt” do të mbahet me respektimin e plotë të masave kundër Covid-19, ndërsa do të lejohen vetëm personat e vaksinuar që të jenë prezent në aktivitetet e tyre artistike.

“Shtyhet FemArt – Festivali Ndërkombëtar për Artiste dhe Aktiviste. Situata e përkeqësuar me Covid-19 dhe versioni Delta dhe masat e Qeverisë kanë bërë që Artpolis të marrë vendim për shtyrje të Festivalit FemArt për javën e parë të tetorit.

Më 1-6 tetor 2021 FemArt do të jetë sërish afër publikut me shfaqje, performanca, muzikë, poezi, ekspozita, punëtori, raporte e konferenca përmes edicionit të 9-të, që vjen me moton “F… Seksizmit”.

Festivali FemArt do të mbahet me respektim të plotë të masave kundër Covid-19 dhe versioni Delta, e vetëm personat e vaksinuar do të mund të jenë prezent në këto aktivitete artistike.

Me ART kundër seksizmit, të VAKSINUAR kundër pandemisë!”, thuhet në njoftimin e tyre. /Telegrafi/