Schmidt: Nuk ka ndryshim të kufijve dhe shtete të reja në Ballkan

Përfaqësuesi i sapoemëruar i komunitetit ndërkombëtar në Bosnje dhe Hercegovinë, Christian Schmidt, tha se vendet e Ballkanit Perëndimor duhet t’i zgjidhin mosmarrëveshjet dhe pengesat midis tyre, për të bërë përparim më serioz drejt Bashkimit Evropian.

Schmidt i bëri këto komente të shtunën në një panel të Forumit të 14-të të Dubrovnikut.

“Kur shikojmë Bosnje dhe Hercegovinën, shohim se problemi i brendshëm që ekziston, nuk është midis shumicës dhe pakicës, por midis tre popujve përbërës dhe të tjerëve. Kur shikojmë Marrëveshjen e Dejtonit nga perspektiva e sotme, shohim se disa pjesë të saj mund të formuloheshin ndryshe, por tani e kemi Marrëveshjen ashtu siç është”.

“Atyre që ende kultivojnë fantazi se do të ishte mirë të ndryshonin kufijtë ose të krijoheshin shtete të reja, unë u them se kjo ka marrë fund”, tha Schmidt, transmeton REL.

Sipas tij, anëtarësimi i Bosnje dhe Hercegovinës në Bashkimin Evropian duhet të mbetet në agjendën politike dhe “tani është koha për ta kthyer çështjen në fokusin politik, për të parë rezultate në vitet e ardhshme”.

Marrëveshja e Dejtonit i ka dhënë fund luftës në Bosnje në vitet 1990 midis forcave serbe, boshnjake dhe kroate.

Me këtë marrëveshje, Bosnja është ndarë në dy entitete – Federata e Myslimanëve dhe Kroatëve dhe Republika Sërpska – të cilat i udhëheqin bashkërisht institucionet qendrore.

Në muajin prill, disa media kanë shkruar për ide të ndryshimit të kufijve në rajonin e Ballkanit Perëndimor, si mundësi për zgjidhjen e çështjeve të hapura nga procesi i shpërbërjes së ish-Jugosllavisë.

Mediat në Bosnje dhe në Slloveni kanë shkruar se kryeministri slloven, Janez Jansha, i ka dorëzuar Bashkimit Evropian një “non paper” me këto ide.

Vetë Jansha ka mohuar se ekziston një “non-paper” i tillë, ndërsa BE-ja ka thënë se nuk ka pranuar asnjë “non-paper” dhe është shprehur kundër ndryshimit të kufijve në Ballkan.

Shtetet e Bashkuara kanë thënë se spekulimet për ndryshim kufijsh në Ballkan janë “kërcënim i panevojshëm për stabilitetin”.

Nga 1 gushti, Christian Schmidt do të pasojë Valentin Inzkon si përfaqësues i lartë i komunitetit ndërkombëtar në Bosnje dhe Hercegovinë.