La pas vetes 38 gra, 89 fëmijë dhe 36 nipër e mbesa – ndërron jetë kreu i ‘familjes më të madhe në botë’

Një burrë 76-vjeçar që besohet të jetë udhëheqësi i familjes më të madhe në botë ka vdekur në shtetin Mizoram të Indisë.

Sipas mediave të huaja, përcjell Telegrafi, Ziona Chana, kreu i një sekti fetar që praktikonte poligaminë, vdiq të dielën, duke lënë pas 38 gra, 89 fëmijë dhe 36 nipër e mbesa.

Lajmi u konfirmua nga kryeministri i Mizoram, Zoramthanga, i cili ofroi ngushëllimet e tij në Twitter “me një zemër të thyer”.

Chana thuhet se vuante nga diabeti dhe hipertensioni.

Mjekët i thanë agjencisë së lajmeve PTI se gjendja e Chana u përkeqësua në shtëpi në fshatin e tij, Baktawng Tlangnuam.

Ai u dërgua me urgjencë në spital të dielën në mbrëmje, ku u shpall i vdekur kur mbërriti.

Sidoqoftë, sipas BBC, është e vështirë të thuash nëse Chana ishte me të vërtetë kryefamiljari i familjes më të madhe në botë pasi ka të tjerë që pretendojnë titullin.

Është gjithashtu e vështirë të vlerësosh madhësinë e saktë të familjes së Chana.

With heavy heart, #Mizoram bid farewell to Mr. Zion-a (76), believed to head the world's largest family, with 38 wives and 89 children.
Mizoram and his village at Baktawng Tlangnuam has become a major tourist attraction in the state because of the family.
Rest in Peace Sir! pic.twitter.com/V1cHmRAOkr

— Zoramthanga (@ZoramthangaCM) June 13, 2021

Të paktën një raport pretendon se ai kishte 39 gra, 94 fëmijë, 33 nipër e mbesa dhe një stërnip, që shton deri në 181 persona.

Ndërsa raporte të ndryshme lokale të lajmeve e kanë referuar atë si mbajtës të “rekordit botëror” për një familje kaq të madhe, është e paqartë se cili është rekordi global.

Por janë apo jo një rekord botëror, Chana dhe familja e tij janë një sensacion lokal, duke tërhequr turistë në fshatin e tyre në veri-lindje të Indisë.

Dhe jeta magjepsëse e Chana ka rrëmbyer disa tituj të mediave ndër vite.

Familja e madhe jeton së bashku në një shtëpi me katër kate të quajtur “Chuuar Than Run” ose Shtëpia e gjeneratës së re, me 100 dhoma.

Gratë e tij ndajnë një konvikt pranë dhomës së gjumit private të Chana, sipas mediave lokale.

Sipas Reuters, Chana ka lindur në vitin 1945. Ai u takua me gruan e tij më të vjetër, e cila është tre vjet më e madhe se ai, kur ishte 17 vjeç.

Familja i përket një sekti të krishterë – Chana Pawl – që ka rreth 2,000 ndjekës. Ata të gjithë jetojnë rreth shtëpisë së Chana në Baktawng Tlangnuam, rreth 55 km (34 milje) nga kryeqyteti i Mizoram, Aizawl.

Sekti, i cili lejon poligaminë për burrat, u themelua nga gjyshi i Chana në vitin 1942. /Telegrafi/