Fushata e vaksinimit dhe fshehja e të vdekurve në Serbi

Mirza Vranjakoviq u beson shumë pak autoriteteve në Serbi, por ka shkuar në vendlindje për shkak të vaksinimit. Ky arkitekt i ri me origjinë nga Novi Pazari, e që tani jeton në Berlin, e di se në Gjermani nuk do t’i vijë radha për vaksinim edhe për një kohë të gjatë. Ndaj ka vendosur të shkojë në Serbi dhe të vaksinohet në Beograd.

“Dua të jem imun ndaj koronavirusit dhe të mos mendoj tërë kohën për mundësinë e infektimit tim apo të dikujt tjetër në afërsinë time. Mendoj se do të jetoj më lirshëm“, thotë Mirza në filmin dokumentar me titull “Vaksina për të gjithë”, të publikuar në Televizion e Dytë Gjerman ZDF, si dhe në kanalin gjermano-francez Arte.

“Dua të vaksinohem me Biontech/Pfizser, i cili njihet në mbarë Evropën, sepse atje jetoj. Në këtë mënyrë do të evitoj edhe vështirësitë burokratike“, tha Mirza.

Në film thuhet se Serbia ka raporte të ngushta me Rusinë dhe Kinën dhe se Serbia ka porositur vaksina nga mbarë bota. Por, shumëkush refuzon të vaksinohet. Në Serbi ka shumë kundërshtarë të vaksinimit, të cilët përhapin frikë ndaj vaksinave.

Ekipi gjerman televiziv ka shoqëruar edhe një ekip mobil për vaksinim në fshatin Radenkovc afër Sokobanjës. Atje jetojnë kryesisht të moshuarit.

“Të gjithë jemi vaksinuar, por goca ime nuk do të vaksinohet. Ajo ende nuk është martuar dhe nuk do të vaksinohet“, thotë një grua e moshuar që shton se vet vajza duhet të vendosë nëse do të vaksinohet apo jo!

“Të vaksinuarit nuk mund të lindin fëmijë”, kjo është një prej teorive më të shpeshta konspirative, të cilën e besojnë shumë njerëz në Serbi.

Gazetarët gjermanë kanë biseduar edhe me mjeken Jovana Stojkoviq, e cila përshkruhet si kundërshtare e vaksinimit në Serbi.

“Sipas të dhënave të institutit tonë Batut, shteti nuk merr përgjegjësinë për pasojat anësore të vaksinimit. Nuk ka garanci për efikasitetin. Kjo është e papërgjegjshme. Të shantazhosh dhe të detyrosh njerëzit të vaksinohen, e të mos marrësh përgjegjësi, kjo është mënyra më e vrazhdtë e represionit”, thotë ajo.

Rade Paniq, kryetari i Sindikatës së mjekëve dhe farmacistëve në Serbi kritikon kushtet në të cilat punojnë mjekët në Serbi, sepse atje kanë vdekur më shumë se 100 mjekë për shkak të kushteve të rënda të punës.

“Një problem shumë i madh është zbatimi i masave kundër koronavirusit, sepse ato nuk respektohen gati askund. Ndoshta kemi të bëjmë me edukimin e keq të popullatës, por edhe me faktin që qeveria serbe për një kohë të gjatë nuk ka ndërmarrë asgjë kundër lobit që kundërshton vaksinimin. Të tillë ka shumë në Serbi, ata janë të zëshëm dhe mund të bëjnë çfarë të duan“, thotë Paniq.

Në film shihen edhe skena përplot me njerëz në Beograd ku thuhet: “Kovidi duket se nuk i frikëson njerëzit këtu, ndonëse vendi është goditur shumë nga pandemia. Muajt e kaluar ka pasur një shkallë të lartë të infektimeve, ndërsa njerëzit këtu janë shumë më të rrezikuar sesa në pjesët e tjera të Evropës. Por, restorantet, kafenetë, butikët dhe dyqanet janë të hapura, ndërsa distancën nuk e respekton askush.

“Jam shumë i habitur kur shoh kaq shumë njerëz pa maska, të relaksuar. Në Gjermani po vazhdon për muaj të tërë mbyllja dhe ke përshtypjen se njerëzit janë të kontaminuar, ikin prej njëri-tjetrit“, thotë Mirza Vranjakoviq.

Gjendja e vërtetë shihet në morgje, ku çdo ditë vijnë shumë makina me të vdekur, por edhe në varreza, ku ekskavatorët me shpejtësi hapin gropa të reja ku futen të vdekurit nga virusi.

“Qindra varreza të freskëta dëshmojnë për dramën për të cilën flitet në qarqet private, por jo edhe në media. Për përmasat e dramës që po zhvillohet në Serbi nuk ka të dhëna zyrtare“, thuhet në këtë film.

Për gjendjen në Serbi ka raportuar ndër të tjera edhe Sandra Petrushiq, gazetare e revistën NIN.

“Në nivelin lokal fshihet diku rreth 60 për qind e të vdekurve nga koronavirusi. Ndërkohë që edhe këto të dhëna përgjysmohen deri sa të mbërrijnë në entin e shëndetit publik Batuta. Sipas llogaritjeve të mia, numri i vërtet i të vdekurve është të paktën dy deri në tre herë më i madh se të dhënat e paraqitura statistikore“, thotë ajo në një bisedë me ekipin e gazetarëve gjermanë.

Në film thuhet se për gjendjen e vërtet raporton vetëm një numër i vogël i mediave të pavarura. Shumica e mediave janë në pronësi të biznesmenëve të afërt me pushtetin. Suksesi i fushatës së vaksinimit është për ta më i rëndësishëm sesa gjendja e vërtetë. Po pse?

“Sepse kjo është fushatë elektorale e presidentit Vuçiq“, thotë Petrushiq. “Prej fillimit është synuar që të dëshmohet se ne jemi më të mirët në Evropë dhe në botë. Vuçiqi ka vendosur se ne do ta mundim koronavirusin për një muaj. E kur kjo dështoi, atëherë filloi fushata se ne jemi më të suksesshëm se të gjithë të tjerët”. /DW/