SHBA, Afrika e Jugut dhe BE-ja do të ndalojnë përkohësisht shpërndarjen e vaksinës Johnson&Johnson

Shtetet e Bashkuara të Amerikës, Afrika e Jugut dhe Bashkimi Evropian do të ndalojnë përkohësisht shpërndarjen e vaksinës Johnson&Johnson (J&J) kundër Covid-19, pas raporteve të mpiksjes së rrallë të gjakut.

Gjashtë raste u zbuluan në më shumë se 6.8 milionë doza të vaksinës, tha Administrata Amerikane e Ushqimit dhe Barnave (FDA).

Por Johnson&Johnson ka ndaluar përhapjen e saj edhe në BE, e cila filloi këtë javë.

Sipas mediave të huaja, përcjell Telegrafi, FDA tha se po rekomandonte një pauzë të përkohshme “si pasojë e një kujdesi të madh”.

Ky institucion konfirmoi që një pacient vdiq nga ndërlikimet e mpiksjes së gjakut dhe një tjetër është në një gjendje kritike.

Të gjashtë rastet ishin te gratë e moshës midis 18 dhe 48 vjeç, me simptoma që shfaqeshin gjashtë deri në 13 ditë pas vaksinimit.

Johnson & Johnson është një kompani e kujdesit shëndetësor amerikan, por vaksina u krijua kryesisht nga dega e saj farmaceutike në Belgjikë, dhe njihet gjithashtu si Janssen.

Ndryshe nga disa vaksina të tjera, kjo jepet si një e vetme dhe mund të ruhet në temperatura normale të frigoriferit, duke e bërë më të lehtë shpërndarjen në klimat më të nxehta ose në zona më të largëta. /Telegrafi/