Kompania braziliane do të ndajë shtatë miliardë dollarë për familjet e viktimave të minierës

Konglomerati brazilian, Vale ka rënë dakord të paguajë më shumë se shtatë miliardë dollarë dëmshpërblim për familjet e viktimave të një katastrofe miniere në shtetin e Minas Gerais, ku mbetën të vrarë 270 persona në vitin 2019.

Autoritetet në Brazilin juglindor thanë sot se ishte arritur një marrëveshje me një nga grupet kryesore të xehetarisë së hekurit në botë në lidhje me katastrofën e 25 janarit 2019. Është marrëveshja më e madhe e kompensimit e arritur ndonjëherë në Amerikën Latine, transmeton Telegrafi.

Ata shtuan se “vlera e marrëveshjes korrespondon vetëm me vlerësimin dhe mund të rritet nëse është e nevojshme”, raporton nasdaq.

Çarja e digës së mbajtjes së mbetjeve të minierës çliroi miliona tonë mbetje mineralesh që zhytën 270 njerëz dhe të gjithë rajonin e shtetit të minierave, duke shkaktuar një katastrofë për florën dhe faunën.

Edhe pas muajsh kërkimesh, njëmbëdhjetë trupa nuk janë gjetur në zonën e gjerë të shkatërruar të qytetit të Brumadinho me 40 mijë banorë.

Vale do të duhet të financojë dekontaminimin e lumit Paraopeba dhe pyllëzimin e zonës së përmbytur me pemë dhe bimë autoktone të klonuara në partneritet me një universitet lokal. /Telegrafi/