AstraZeneca thotë se do të kombinojë vaksinën e tyre me atë ruse Sputnik V, për të parë nëse mund të rritet efikasiteti

Gjiganti farmaceutik britanik, AstraZeneca, tha të premten se së shpejti do të fillojë punën me Institutin Gamaleya të Rusisë për të parë nëse vaksinat e tyre kundër coronavirusit mund të kombinohen me sukses.

Sipas medieve të huaja, përcjell Telegrafi, lajmi vjen pasi zhvilluesit e vaksinës Sputnik V iu afruan AstraZeneca-s përmes Twitter në fund të muajit të kaluar për të pyetur nëse duhet të përpiqen të kombinojnë dy vaksinat e bazuara në virusin e ftohjes për të rritur efikasitetin.

“Të jesh në gjendje të kombinosh vaksina të ndryshme kundër COVID-19 mund të jetë e dobishme për të përmirësuar mbrojtjen. Kjo është arsyeja pse është e rëndësishme të eksploroni kombinime të ndryshme të vaksinave për të ndihmuar në krijimin e programeve të imunizimit më fleksibil”, tha Astra Zeneca në një deklaratë të premten.

“Është gjithashtu e mundshme që kombinimi i vaksinave të çojë në përmirësimin e imunitetit për një periudhë të gjatë kohore”, thuhej tutje.

Vaksina kundër COVID-19 e AstraZeneca-s, e prodhuar në bashkëpunim me Universitetin e Oksfordit, është njëra prej vaksinave që ka kërkuar aprovimin nga rregullatorët shëndetësorë për aplikim.

Rezultatet e publikuara së fundmit në The Lancet, tregonin se vaksina e AstraZenaca-s ka një efikasitet me një mesatareje prej 70.4 për qind, derisa Rusia thotë se vaksina Sputnik V është më shumë se 90 për qind efektive në parandalimin e njerëzve nga kontraktimi i virusit. /Telegrafi/