Mitrovicë, bëhen përgatitjet për fillimin e vitit të ri shkollor

Drejtori i Arsimit në Komunën e Mitrovicës, Egzon Jashari, mbajti takim me drejtorët e shkollave të Mitrovicës, me të cilët ka biseduar për fillimin e vitit të ri shkollor, si dhe për bashkëveprimin e mëtejme të aktiviteteve pas situatës së pandemisë në vend.

Më tutje drejtori Jashari ka thënë se në bashkëpunim me Institutin Kombëtar të Shëndetit Publik dhe Ministrinë e Arsimit dhe Shkencës, shpreson që viti i ri shkollor të fillojë me sukses dhe pa shkëputje eventuale.

“Për shkak të pandemisë Covid-19, një pjesë e mësimit u organizua nga distanca e në kushte shtëpie dhe për të gjithë ishte një përvojë e re, andaj dua të falënderoj të gjithë mësimdhënësit për angazhimin e tyre. Pas një shkëputje prej mese gjashtë muaj, nxënësit do të kthehen në bankat e tyre shkollore, prandaj ti presim duar hapur”, ka thënë drejtori Jashari.

Po ashtu gjatë këtij takimi drejtori Jashari, ka theksuar se të gjithë ata mësimdhënës që kanë pasur ndonjë simptomë eventual janë testuar dhe fatmirësisht të gjithë kanë rezultuar negativ.

Ndërsa të gjitha shkollat u shprehën që kanë bërë të gjitha përgatitjet e kërkuar me Udhëzuesin e Përgjithshëm të Ministrisë së Arsimit dhe Shkencës për fillimin e mësimit me prezencë në shkollë duke pasur në fokus ciklin klasor (klasat 1 deri në 5) si dhe klasën e 6-të dhe atë të 10-të në shkollimin e mesëm të lartë.

Edhe drejtorët e shkollave të komunës së Mitrovicës ofruan bashkëpunimin e tyre të plotë si dhe gatishmërinë që ky vit shkollorë të nisë sa më mbarë dhe fëmijët të gëzojnë shëndet të plotë përgjatë procesit të mësimnxënjes. /Telegrafi/