Grekët e pranojnë, por jo historiografia shqiptare

Gazeta greke “Greekcitytimes”, më 6 shtator 2020, shkruan: “Në përvjetorin e marrëdhënieve zyrtare midis Greqisë dhe Rusisë, që u vendosën në 6 shtator 1828, Ministria e Jashtme e Rusisë reflekton përmes një deklaratë se si Rusia në mënyrë aktive kontribuoi për formimin e shtetit të ri grek”.

“Kontributi domethënës i Rusisë për pavarësinë greke është gjerësisht i pranuar nga publiku grek”, thotë Ministria e Jashtme e Rusisë në një deklaratë. Një e vërtetë e fshehur historike, Rusia, me ndihmën e Anglisë dhe të Francës, është fabrikuesja kryesore e krijimit të shtetit të pavarur të Greqisë në vitet ‘20-‘30 të shekullit XIX me gjysmën e territoreve shqiptare dhe me gjysmën e popullsisë shqiptare.

Aksioni gjeopolitik i Rusisë u emërtua “revolucion grek” dhe “revolucioni grek” filloi në Odesë të Rusisë, jo në Athinë. Është e kuptueshme që autorët rusë, grekë, anglezë etj. synojnë të mbajnë në këmbë mitin e diplomacisë së tyre për “revolucionin grek”.

E habitshme është përse historiografia zyrtare e Shqipërisë ka bërë tezë të saj përrallën ruse të “revolucionit grek” dhe nuk e përmend kurrë dhe e fsheh të vërtetën historike se Rusia krijoi shtetin e ri të Greqisë.