Trumpi refuzon ta dënojë Rusinë për helmimin e Navalnyt, thotë se nuk ka prova

Presidenti i SHBA-së, Donald Trump ka refuzuar të dënojë Rusinë për helmimin e Alexei Navalnyt, duke thënë se nuk pa prova për këtë.

Ai tha se ishte një rast “tragjik”, por nxiti gazetarët të përqendrohen në vend të kësaj te Kina, e cila është një kërcënim më i madh për botën sesa Rusia.

Nga ana tjetër, NATO dhe Gjermania thonë se ka “prova të padyshimta” që Navalny u helmua me gaz nervor sovjetik, transmeton Telegrafi.

Dhe ndërsa ekipi i tij thotë se ishte helmuar me urdhër të Kremlinit, Rusia e mohon atë, shkruan BBC.

“Kështu që unë nuk e di saktësisht se çfarë ka ndodhur. Unë mendoj se është tragjike, e tmerrshme, nuk duhet të kishte ndodhur. Ne nuk kemi ende ndonjë provë, por do t’i hedhim një vështrim”, tha Trump.

Presidenti amerikan gjithashtu ndaloi të kritikonte Vladimir Putinin dhe tha se Pekini paraqiste një kërcënim më të madh.

Lexo po ashtu Publikohen pamjet brenda aeroplanit: Pasi u helmua me çaj, lideri i opozitës ruse dëgjohet duke rënkuar

“Është interesante që të gjithë gjithmonë e përmendin Rusinë dhe nuk më shqetëson që ju të përmendni Rusinë, por unë mendoj se Kina është një komb për të cilin duhet të flisni shumë më shumë në këto momente”, shtoi Trump.

Trump nuk mbajti një qëndrim kaq të mprehtë sa Departamenti i Shtetit, i cili të premten shprehu shqetësim serioz në lidhje me zbulimin se Navalny ishte helmuar. /Telegrafi/