Xhamia e Çarshisë, më e vjetra në Prishtinë në gjendje të mjerueshme – punimet për restaurimin e saj nuk u përfunduan kurrë

Ndërtimi i Xhamisë së Madhe në Prishtinë, së fundi ka nxitur debat publik, përfshirë edhe protesta.

Zyrtarë të BIK-ut në vazhdimësi kanë ripërsëritur domosdoshmërinë e kësaj xhamie, që do të përmbushte kërkesat e besimtarëve.

Për protestën e së mërkurës reagime ka pasur edhe nga liderët e shtetit të Kosovës dhe të partive politike.

Por, pos kësaj, reagim qytetar ka pasur edhe Xhaminë e Çarshisë në Prishtinë.

Ersen Shileku, në llogarinë e tij në Facebook, ka hedhur akuza ndaj Bashkësisë Islame për gjendjen e tanishme të saj.

Ai ka publikuar fotografi përbrenda xhamisë, ku shihen mbeturina e gjësende të ndryshme, dhe thotë se po përdoret për pisllëqe.

“Asnjë presion nuk është bërë për përfundimin e këtij restaurimi sepse ky objekt shumë kujt i duket i parëndësishëm, e sipas të gjitha gjasave edhe vet praktikuesve”, shkruan Shileku.

Ndërkaq, restaurimi i Xhamisë së Çarshisë është paraparë të përfundonte në vitin 2013, por kjo nuk ka ndodhur.

Që nga ndërprerja e punimeve në vitin 2013 restaurimi dhe konservimi i kësaj xhamie nuk ka rifilluar ende.

Kjo situatë po kontribuon që objekti i Xhamisë së Çarshisë të degradohet.

Xhamia e Çarshisë ose Xhamia e Sulltan Muratit është ndërtuar në vitin 1393 nga Sulltan Bajaziti i I-rë për ta përkujtuar fitoren e forcave osmane dhe Sulltan Muratit në betejën e Kosovës të vitit 1393.

Xhamia fillimisht gjendej përballë Çarshisë së Vjetër e cila u demolua në vitet e 60-ta, prandaj edhe sot mban emërtimin Xhamia e Çarshisë. Kjo është xhamia më e vjetër në qytet dhe mbetet një prej objekteve kryesore të trashëgimisë kulturore në Prishtinë, njofton Telegrafi.