Deputeti nigerian humb vetëdijen gjatë seancës parlamentare që transmetohej drejtpërdrejtë

Deputeti nigerian Daniel Pondei ka humbur vetëdijen gjatë të hënës në një transmetim live të seancës parlamentare, të mbajtur lidhur me hetimet për pretendimet për keqmenaxhim të një organizate për zhvillim ekonomik në rajonin Delta të Nigerisë që është e pasur më naftë.

Siç raporton Reuters, Pondei, ushtrues detyre i drejtorit të përgjithshëm pranë komisionit nigerian për zhvillimin e Deltas (NDDC), është dërguar me urgjencë në spital pasi humbi vetëdijen gjatë seancës, derisa po dëshmonte para komisionit, transmeton Telegrafi.

Pasi kishte humbur vetëdijen, personat që ishin përreth tij e kanë ngritur duke tentuar që të parandalojnë ngufatjen. Deputetët e parlamentit të Nigerisë, janë duke hetuar pretendimet për korrupsion lidhur me furnizime të ndryshme në NDDC.

Hetimet janë urdhëruar të fillojnë nga presidenti Mohammed Buhari gjatë tetorit të vitit të kaluar. Megjithatë Delta në Nigeri vazhdon të jetë rajon i varfër, pavarësisht faktit që prodhon naftë dhe e distribuon në pjesët më të mëdha të Afrikës.

Ndërkaq Pondei para se të humbte vetëdijen tha në panel: “Në NDDC nuk mungojnë paratë që kur e ka marrë përsipër menaxhimin e saj gjatë këtij viti. Gjithçka çfarë kemi bërë është brenda kornizave të procedurave të parapara”.

Është pikërisht nafta ajo që e bën Nigerinë të ketë një ekonomi “stabile” dhe atë e eksporton nëpër tërë kontinentin e Afrikës. /Telegrafi/