Përplasja mes demonstruesve dhe policisë, rrugët përreth Kuvendit të Serbisë ngjajnë me skena lufte

Pas përplasjes mes demonstruesve dhe policisë, rrugët përreth ndërtesës së Kuvendit të Serbisë duken si skena të një konflikti lufte.

Kështu shkruajnë mediat serbe, sipas të cilave atje shihen kontejnerët duke u djegur, gurë të shumtë dhe shenja të shumta trafiku të hequra, përcjell Telegrafi.

Pas protestave të djeshme për shkak të njoftimit për rikthimin e mundshëm të shtetrrethimit në kryeqytet dhe demonstratave që përshkallëzuan para ndërtesës së Asamblesë Kombëtare, disa organizata politike njoftuan një tubim edhe për ditën e sotme.

Një gjë e tillë madje ndodhi edhe pse presidenti i Serbisë, Aleksandar Vuçiq, deklaroi sot në një fjalim publik se nuk do të ketë ndalime shumë-ditore për lëvizje, por që vendimi përfundimtar do të merret nga Qeveria e Serbisë nesër.

Siç ishte raportuar më herët edhe gjatë ditës së sotme kishte incidente përpara Kuvendit, duke shtuar se disa protestues shënjestruan policinë.

Ndërkohë, siç kanë raportuar mediat, protesta janë organizuar edhe në qytete tjera si Novi Sad, ku protestuesit dëmtuan ndërtesën e Bashkisë në qendër të qytetit.

Ndryshe, më 7 korrik, pas një konference për media të presidentit serb, Aleksandar Vuçiq, qindra qytetarë u mblodhën para parlamentit serb për të kundërshtuar paralajmërimet për rivendosjen e orës policore.

Nga përleshjet para ndërtesës së parlamentit serb, mbetën të plagosur dhjetëra pjesëtarë të policisë dhe protestues.

Lidhur me protestat, Vuçiq, kishte thënë se protestat nuk kanë të bëjnë me coronavirusin por ato janë “dhunë politike” ndaj institucioneve të Serbisë. /Telegrafi/