Pezullimi i Ligjit për Paga, SBASHK-u pritet të mbajë mbledhje të jashtëzakonshme

Gjykata Kushtetuese e Kosovës, sot ka bërë të ditur se ka pezulluar deri më 30 mars të vitit 2020 zbatimin e Ligjit për Paga.

E lidhur me këtë vendim nuk janë shprehur të kënaqur Sindikata e Bashkuar e Arsimit, Shkencës dhe Kulturës së Kosovës (SBASHK).

Lexo po ashtu Gjykata Kushtetuese ka pezulluar Ligjin për Paga deri më 30 mars

Nënkryetarja e SBASHK-ut, Vjollca Shala në një prononcim për Telegrafin, ka deklaruar se ky është një vendim mjaftë shokues për të gjithë punonjësit e sektorit privat.

Shala ka theksuar se SBASHK-u së shpejti do ta mbledh në një takim të jashtëzakonshëm Këshillin Drejtues dhe kryetarët e sindikatave komunale të arsimit.

“Është një vendim mjaft shokues. Siç e dimë nesër do të kemi grevë dy orësh në të gjitha institucionet arsimore duke filluar nga çerdhet e deri tek universitet. Lidhur me vendimin e Gjykatës Kushtetuese së shpejti do të mbajmë një takim të jashtëzakonshëm me kryetarët e sindikatave komunale të arsimit dhe Këshillin Drejtues”, ka thënë Shala.

Ajo ka shtuar se nesër do ta shikojnë për së afërmi mbarëvajtjen e grevës, dhe pastaj do të bisedojnë edhe me mësimdhënësit që të shohin se si do të veprojnë tutje.

Lexo po ashtu Pas pezullimit të Ligjit për Paga, mjekët të premten në grevë

“Nuk kemi akoma ndonjë datë se kur do ta mbajmë takimin e jashtëzakonshëm, mirëpo mund të them se çfarëdo që do të vendoset në këtë takim ne do ta zbatojmë”, tha Shala.

Kujtojmë se deputetët e legjislaturës së fundit të Kuvendit të Kosovës me 62 vota për, asnjë kundër dhe 1 abstenim, në muajin shkurt të këtij viti, kishin miratuar Ligjin për Pagat në sektorin publik.

Ligji pritet të rregullojë pagesën e të punësuarve që marrin rroga nga buxheti i shtetit, ku koeficienti më i lartë është 10 dhe më i ulëti është 1 dhe vlera monetare e koeficientit për vitin e parë do të jetë 239 euro. /Telegrafi/