Edhe Fazli Behrami ftohet nga Gjykata Speciale

Ish-luftëtari i Ushtrisë Çlirimtare të Kosovës, Fazli Behrami është i ftuari i radhës i Gjykatës Speciale.

Këtë e ka bërë të ditur kryetari i Organizatës së Veteranëve të Luftës, Hysni Gucati.

Ai ka shkruar në profilin e tij në Facebook, se sot ka marrë lajmin se Fazli Behrami është ftuar nga Gjykata Speciale.

“Tash e mora lajmin qe i ftuar nga gjykata speciale është bashkëluftëtari i brigadës 113 “Mujë Krasniqi”, Fazli Behrami nga fshati Abri e Ulët komuna e Skenderajt. Edhe ky, si gjithë të ftuarit tjerë, do të dalin faqebardhë”, ka shkruar ai, transmeton Telegrafi.

Ndërkohë numri i personave të ftuar deri më tani nga Gjykata Speciale ka arritur të kalojë shifrën 100, teksa pjesë e intervistimeve ishin edhe figurat e rëndësishme të skenës politike në vend, si: kryeministri në detyrë Ramush Haradinaj, ish-komandanti i Zonës Operative të Llapit, Rrustem Mustafa dhe ish-komandanti Sami Lushtaku, një ndër udhëheqësit kryesorë të Noredimës, Shukri Buja, Time Kadrijaj, Sylejman Selimi e shumë ish-pjesëtarë të tjerë të UÇK-së. /Telegrafi/