Më 2 shtator protestohet kundër mbylljes së 19 shkollave në Kamenicë

Banorët e brezit kufitar do të protestojnë më 2 shtator në shenjë pakënaqësi me vendimin për mbylljen e nëntëmbëdhjetë shkollave fillore në Komunën e Kamenicës.

Kryetari i Bashkësisë Lokale të fshatit Karaçevë e Poshtme, Selver Lenjani, ka thënë për gazetën “Epoka e re” se qytetarët nuk do ta lejojnë mbylljen e këtyre shkollave.

Ai ka kërkuar nga kryetari të tërhiqet nga kjo kauzë e dëmshme.

“Në mesin e 19 shkollave për të cilat kryetari i komunës së Kamenicës, Qëndron Kastrati, ka marrë vendim me i mbyll është edhe Shkolla Fillore ‘Asllan Thaçi’, me 100 nxënës në Karaçevë të Poshtme. Në listë të mbylljes është edhe shkolla ‘Avni Rrustemi’ me 102 nxënës në Karaçevë të Epërme. Mbyllja e këtyre shkollave është shqetësuese për banorët e Karaçevës, prandaj nuk do të lejojmë të ndodhë kjo. Do të jemi këmbëngulës në këtë drejtim dhe nuk do të lëmë gurë pa lëvizur për të arritur sukses. Është marrë vendim që më 2 shtator të protestojmë kundër mbylljes së shkollave shqipe, posaçërisht në brezin kufitar në Karaçevë. Qytetarët e Komunës së Kamenicës do të vihen në mbrojtje të shkollave të tyre dhe kjo është e vetmja mundësi për t’i mbrojtur ato”, ka deklaruar Lenjani.

Kurse kryetari i Komunës së Kamenicës, Qëndron Kastrati, ka thënë për gazetën se nuk ka mbyllje të shkollave, por riorganizim të tyre.

Ai ka theksuar se kjo reformë është domosdoshmëri dhe ndikon në rritjen e cilësisë në arsim.

Sipas Kastratit, ky proces është në të mirë të nxënësve dhe nuk do të largohet askush nga puna.