U kthye nga Gjermania në Kosovë, Bashkim Bytyqi sot bën punime edhe për amerikanët

Bashkim Bytyqi është kthyer nga Gjermania vetëm për të punuar mozaik, art ky i cili konsiderohet si i vështirë për tu praktikuar.

Ka realizuar mbi 60 të tillë dhe ka 8 vite që merret me to.

E gjithë këtë punë, Bashkim Bytyqi e realizon me një mjet të vetëm.

“Me punën e mozaikut merrem prej tetë vitesh. Ideja e këtij hobi që tashme ka kaluar në profesion është nga Gjermania kur kemi punuar me vëllain. Kemi punuar për Gjermani, pastaj është shfaqur interesimi edhe për Kosovë. Kamë bërë mbi 60 punime, pa llogaritur logot e ndryshme që kemi punuar për firma jashtë vendit. Lënda e parë që është guri prehet me makinë, dhe pastaj kemi vetëm një mjet pune, e ato janë danet të cilat i japin formën gurit dhe realizohen punimet”, tregon për RTV Dukagjinin, Bashkim Bytyqi.

Byqyqi ka thënë që një punim i tillë merr shumë kohë për tu përfunduar por dashuria për këtë art, bën që ta realizon me kënaqësi.

“Një punim më merr kohë rreth një vit. Po të llogarisë me orë, ndoshta tre muaj punë të plota kam bërë së paku. Ka raste kur ndoshta dhjetë orë as bukë nuk ha për të punuar në realizimin e veprës”, tregon më tej Bashkim Bytyqi.

Mozaikët i punon në bazë të kërkesave të klientëve, mirëpo në kohë të lirë bën punime  bazuar në kreativitetin e tij.

“Ka interesim. Ka qenë mungesa e reklamave, derisa jam shfaqur në televizione, ato më kanë ndihmuar shumë. Pastaj duke ju falënderuar rrjeteve sociale, ato kanë qenë reklama ma e madhe te unë. Mozaiku i parë ka qenë një ishull në Amerikë. Porto Riko më duket. Dhe ajo është bërë dhuratë për këta amerikanët që kanë ardhur në Suharekë”, tregon ndër të tjera Bashkim Bytyqi.

Bashkim Bytyqi ka thënë se punimet e tij i karakterizojnë Nuancat e ngjyrave të ndryshme të mermerit dhe granitit. /Telegrafi/