Prokuroria: Lumezi e merr vetëm një rrogë e jo shtatë

Zyra e Kryeprokurorit të Shtetit sqaron se njoftimi zyrtar i subjektit politik “Vetëvendosje” për mbajtjen e protestës para objektit të Prokurorisë së Shtetit, ku ndër të tjera thuhet se “…i merr shtatë rroga”, duke iu referuar Kryeprokurorit të Shtetit është një konstatim i pavërtetë, tendencioz dhe propagandues që kanë për qëllim dëmtimin e autoritetit dhe prestigjit të Kryeprokurorit të Shtetit.

“Njoftojmë opinionin publik se, Kryeprokurori i Shtetit, Aleksandër Lumezi, si funksion primar e ushtron vetëm pozitën e Kryeprokurorit të Shtetit, ndërsa, sipas ligjeve në fuqi, përveç pozitës primare, Kryeprokurori i Shtetit “ex officio” sipas detyrës zyrtare, e ka për obligim të jetë i angazhuar edhe si anëtar i bordeve institucionale të fushës së drejtësisë dhe sigurisë, përkatësisht mekanizmave që kanë të bëjnë me sundimin e ligjit. Andaj, Kryeprokurori i Shtetit nga buxheti i shtetit e merr vetëm një rrogë”, thuhet në një komunikatë.

Prandaj, ushtrimi i funksionit të Kryeprokurorit të Shtetit dhe angazhimet e tjera publike janë obligime ligjore, të cilat dalin nga ligjet e miratuara në Kuvendin e Kosovës.

Më këtë rast ia rikujtomë publikut opinionin juridik të Agjencisë Kundër Korrupsionit (AKK), ku thuhet se “të gjitha angazhimet e Kryeprokurorit të Shtetit nuk janë në kundërshtim me Ligjin për parandalimin e konfliktit të interesit”.

Lexo po ashtu KPK reagon për gjuhën e përdorur nga Vetëvendosje ndaj kryeprokurorit Lumezi

Prokurori i Shtetit e respekton të drejtën kushtetuese të secilit individ apo grupi të caktuar për të protestuar, mirëpo, nuk do të lejojë që konstatimet e pavërteta dhe tendencioze të shndërrohen në kauza të rreme të individëve, subjekteve politike apo grupeve të caktuara të interesit.

Bashkangjitur gjeni edhe opinionin e Agjencisë Kundër Korrupsionit. (Kliko KËTU). /Telegrafi/