Vazhdojnë demonstratat në Algjeri, kërkohet edhe largimi i qeverisë së përkohshme (Video)

Megjithëse presidenti Abdelaziz Bouteflika ka dhënë dorëheqje, po kërkohet edhe shkarkimi i qeverisë së përkohshme dhe ndryshime rrënjësore në udhëheqësi.

Algjeria po vazhdon të përballet me demonstrata masive edhe pse presidenti që sundoi për 20 vjet dha dorëheqje, duke mos kërkuar edhe mandatin e pestë, transmeton Telegrafi.

Protestuesit po kërkojnë që të largohet edhe largimi i qeverisë së përkohshme, që të bëhen ndryshime rrënjësore dhe sistemi qeveritar të zëvendësohet me një të ri. “Nxirrini gjithë jashtë” është motoja e protestuesve, që e kundërshtojnë qeverisjen e një grupi të ngushtë, të njohur për nepotizëm dhe korrupsion.

Shqetësimi kryesor është te udhëheqësi kryesor i ushtrisë, Ahmed Gaid Salah që ka fuqi udhëheqëse dhe mund ta shfrytëzojë këtë vakum politik. Kërkohet që atij t’i pamundësohet ndonjë ndryshim pozicioni, në 90 ditët e qeverisë së përkohshme deri në shpalljen e zgjedhjeve të reja.

The Guardian raporton se që nga muaji i kaluar, rrugët e kryeqytetit Algjer janë mbushur me qindra mijëra protestues që kërkonin dorëheqjen e presidentit 82-vjeçar.

Fillimisht ishin paqësore dhe u shndërruan në festë, kur u mësua se Bouteflika do të largohet nga pozita ku qëndroi për dy dekada, ndërsa në vitet e fundit është parë shumë rrallë.

Mirëpo, policia është dashur të përdorë gaz lotsjellës dhe forcë të shtuar për të shpërndarë protestuesit, që u bën të dhunshëm në qëndrimet e tyre. /Telegrafi/