Dikur “gufonte” nga njerëzit dhe jeta dinamike, sot është një vend “fantazmë” – fshati magjik në Kinë që humbi betejën nga natyra (Foto/Video)

Fshati i braktisur Houtouwan në ishullin kinez Shengshan, duket vërtetë përrallor, dhe për këtë është bërë atraksion turistik. Megjithatë është një destinacion i pazakontë për turistët.

Jo larg nga Kina kontinentale dhe 64 kilometra nga Shangai, gjendet Shengshan. Ky ishull është vetëm pak kilometra i gjerë, dhe është i mbuluar me kodra të larta, e gjëja e vetme që e bën të veçantë është fshati i dikurshëm i peshkatarëve Houtouwan, transmeton Telegrafi.

Dikur Houtouwan ka qenë fshat i populluar kryesisht me peshkatarë, kurse gjatë viteve të ’80-ta numëronte tremijë banorë. Megjithatë, zhvillimi i shpejtë i Kinës ka lënë gjurmë në fshatra. Anijet u bën atë që të mëdha sa që nuk mund të lundronin në portin e Houtouwanit. Ky fakt nuk paraqiste vetëm një problem ekonomik, por gjithashtu ndikonte në nevojat themelore për një jetë të qetë.

Problem tjetër paraqiste vendndodhja e lartë dhe kështu fshatarët filluan të largohen, e në vitin 2002 ky fshat edhe zyrtarisht mbeti pa as edhe një banorë. Atë sot e ka pushtuar natyra. Shtëpitë janë të mbuluara me gjelbërim dhe ndoshta edhe për këtë ka marrë emrin e fshatit më të gjelbër në botë.

Por, kur në vitin 2015 u “rizbulua”, brenda pak muajve rifitoi epitetin e destinacionit të preferuar për turistë nga e mbarë bota. Megjithatë, autoritetet brengoseshin se si do t’ia dalin me numrin e madh të turistëve që do ta “pushtojnë” ishullin.

Shtëpitë janë të ndërtuara nga majat e kodrave e deri në det. Disave u mungojnë muret e ndoshta edhe kulmet, kurse vegjetacioni i ka pushtuar edhe nga brenda. Në këto shtëpi kanë mbetur mobiliet dhe gjësendet e tjera të paprekura, dhe duket sikur magjistari i ka zhdukur njerëzit dhe i ka zëvendësuar me gjelbërim, dhe kështu bari rritet edhe nëpër shtretër dhe dollapë.

“Në fshatrat tjera fqinje ka ende banorë. Vetëm Houtouwan ka mbetur pothuajse i boshatisur dhe i është dorëzuar natyrës”, ka deklaruar fotografi Jian që ka pasur rastin ta vizitojë këtë vend magjik.

Kurse turistët që ia mësyjnë këtij vendi, rrugëtimin deri në këtë fshat mund ta konsiderojnë si ushtrime të përkryera, kurse në afërsi mund të blejnë vetëm shishe me ujë e tashmë disa persona janë rikthyer që të punojnë si ciceronë. E për të mbetur ata pak njerëz gjallë, vizitorët duhet të paguajnë një shumë të caktuar të parave si “biletë” për t’u futur në fshat. /Telegrafi/