Bellanoc-Stançiç, kufiri që po ngec

E iniciuar që në vitin 2011, ndërsa e planifikuar të hapej në janar të këtij viti, vendkalimit kufitar Bellanoc-Stançiç nuk i duket fundi. Përveç asfaltimit të rrugës me dy korsi, nga fshati Sllupçan deri në fshatin Stançiç të Kosovës, objekti ku duhet të vendoset pika kufitare akoma nuk ka përfunduar, edhe pse në qershor të vitit të kaluar, zëvendëskryeministri i Kosovës, Enver Hoxhaj, ai i Maqedonisë, Bujar Osmani dhe ambasadori i BE-së në Shkup, Samuel Zhbogar, vunë gurthemelin e objektit kufitar, ndërsa siguruan se në janar 2019, pika kufitare do të jetë e hapur.

Punët në terren herë ngecin e herë zhvillohen me tempo të ngadalësuar, ndërsa në afërsi të pikës kufitare, janë katër gurë betoni që kanë bllokuar hyrje-daljet Maqedoni-Kosovë. “Kantier ndërtimi” dhe “Kujdes! Zonë punimesh” janë shënimet e vetme që shoqërojnë murin prej telash në mes të rrugës, ndërsa kati i dytë i objektit kufitar ka mbetur në gjysmë. Projekti ndërkufitar Maqedoni-Kosovë realizohet me financimin e Bashkimit Evropian, ndërsa është pjesë e projekteve për bashkëpunim ndërkufitar. Veç kësaj, edhe rruga që çon drejt vendkalimit kufitar, nga fshati Sllupçan deri në Bellanoc, tashmë është në gjendje të mjerueshme. Gurë dhe dheu anash tashmë janë shembur në rrugë, ndërsa duket se asnjë institucion, qoftë lokal apo qendror, nuk kujdeset për pastrim. Tanimë rruga me dy korsi ka mbetur e hapur vetëm në mes, pasi anash nuk qarkullohet dot. Në Komunën e Likovës thonë se përgjegjësia për kujdesin e rrugës nuk bie mbi ta, pasi është rrugë regjionale dhe jo lokale. “Kujdesi për këtë rrugë nuk bie mbi ne, por mbi ndërmarrjen ‘Rrugët Shtetërore’, pasi është rrugë regjionale”, thonë në Komunën e Likovës.

Analizat gjeologjike, shtojnë në Komunën e Likovës, kanë treguar se problem paraqet përbërja e tokës e cila nuk është e nivelit me të cilën është bërë projekti fillestar. Dhe me këtë, rrezik për rrëshqitjen e dheut dhe gurëve vazhdon edhe më tej, ndërsa nuk ka asnjë shpresë se deri në fund të vitit, do të mund të përfundojnë punimet. Në Qeveri konfirmojnë se nga ana kosovare po bëhen analiza rreth gjeologjisë së tokës, pikërisht në pjesën ku ndërtohet objekti kufitar, pasi ky vend i takon Kosovës.

“Megjithëse punimet janë nga fundi, shpresojmë se deri edhe pak muaj, pika kufitare të hapet. Është obligim i palës kosovare që të përfundojë me ndërtimin e objektit kufitare dhe rrugës në atë pjesë. Ndërsa ne, me hapjen e pikës kufitare, do të pastrojmë edhe shembjen e dheut në pjesën mbi fshatrat e Likovës e deri në kufi”, thonë në Qeveri. Ankohen edhe banorët e fshatrave të Likovës. “Kemi shpresuar që kjo rrugë, ashtu siç ishte thënë, të përfundojë me kohë dhe të ishte hapur tani këtë vit. Por, duket se nuk do të hapet edhe gjatë kohë. Kjo është tallje me komunën tonë, sepse për të udhëtuar në Kosovë, na duhet të shkojmë që në Bllacë, dhe pastaj të lidhemi me Gjilanin dhe qytetet tjera të Kosovës. Të bëjmë edhe rreth 150 kilometra më shumë vajtje-ardhje deri në Gjilan, ndërsa këndej nga Bellanoca kursejmë deri në dy orë”, tha, Sead Zimberi nga fshatrat malor të Likovës./Koha.mk/