Thaçi: KEK po punon me kapacitet të plotë

Përfaqësues të Komisionit për Zhvillim Ekonomik kanë parë sot punën dhe sfidat me të cilat po ballafaqohet Korporata Energjetike e Kosovës (KEK).

Drejtori menaxhues i KEK-ut, Nijazi Thaçi tha se kjo kompani nuk po përballet me asnjë problem.

“I njoftuam për të arriturat e KEK-ut, për gjendjen aktuale që e kemi , prodhimin që e kemi sot, si dhe sfidat që i ka kaluar KEK-u në këtë vit. Edhe një herë e konfirmova se KEK-u është duke punuar me kapacitet të plotë, momentalisht ne operojmë me 800 megavat orë. Blloku B1 i Kosovës B ka qenë në remont që nga shtatori, ndërsa është kthyer në punë më 13 dhjetor. Absolutisht nuk ka kurrfarë problemi as kurrfarë telashe”, ka thënë Thaçi.

Kryetarja e Komisionit për Zhvillim Ekonomik, Sala Berisha Shala, ka thënë se këtu ka parë disa probleme, të cilat duhet diskutuar në Kuvend.

“Sot mora informacione shumë të rëndësishme për punën që zhvillohet këtu, për punën e mirë që e bën drejtori me ekipin e tij. Kosova e dimi se po ballafaqohet me reduktime të ashpra të energjisë elektrike. Sot drejtori me bashkëpunëtorët e tij na konfirmoj se nuk është problem për shkak të prodhimit të termocentraleve tona, sepse furnizimi me qymyr është në nivelin e duhur… Në fakt KEK-ut kuptova se ballafaqohet edhe me sfida të tjera, të cilat duhet të adresohen në kuvendin e Kosovës, siç janë ngarkesa me tantiemën, që është një ngarkesë e lartë dhe besoj që në të ardhmen kur qeveria e sjell në kuvend shqyrtimin e taniemave, do të angazhohemi bashkërisht.

Ajo tutje tha se për reduktimet e energjisë adresa është KEDS dhe KESCO, e jo KEK-u.

“Sfidë mbi sfidat është prodhimi i energjisë elektrike, në fakt çmimi i energjisë nën koston e prodhimit që në këtë rast janë marrëveshjet, KEDS dhe KESCO që KEK-u u shet atyre me këtë çmim. Edhe kjo është një çështje që duhet ta shqyrtojmë dhe analizojmë që mos të shitet ky mall nën koston e prodhimit, por ta ketë çmimin e tregut. Reduktimet e energjisë elektrike që ballafaqohen qytetarët e Kosovës sot, nuk është adresa KEK-u, adresa është në KEDS dhe KESCO”, theksoi Shala Berisha.

Në këtë takim nuk kanë marr pjesë anëtarët e tjerë të Komisionit, përveç deputetes nga radhët e PDK-së, Evgjeni Thaçi Dragusha. /KP /Telegrafi/