Flamur Gashi, fotografia e të cilit u keqpërdor për mashtrim në Amerikë: Do të angazhoj avokat për këtë çështje

Ish-Ambasadori i Shqipërisë në Bosnjë e Hercegovinë, Flamur Gashi, ka thënë se është njoftuar lidhur me një mashtrim që dikush ka bërë në Amerikë duke keqpërdorur fotografinë e tij.

Gashi ka thënë se do të shikojë mundësitë për të angazhuar edhe avokat për të zgjidhur këtë çështje.

Megjithëkëtë, ai ka thënë se është gëzuar që është zbuluar rasti në mënyrë që të mos ketë më mashtrime ndaj njerëzve të tjerë.

“Do të bisedoj me një avokat, mikun tim në Amerikë. Mbrëmë e kam marrë vesh. Mu duk pak absurde”, ka thënë Gashi, për Gazetën Express.

“Më vjen mirë që është zbuluar kjo ngjarje dhe të mos ketë viktima”, ka shtuar ai.

Siç raporton Daily Mail, një e ve nga Orlando ka humbur të gjitha kursimet e jetës së saj, pasi u mashtrua nga një person i cili përdorte fotografinë e Flamur Gashit, vëllait të deputetit të LDK-së, Arben Gashit.

Siç shkruan Daily Mail, Diane Standish nga ky mashtrim humbi plot 270 mijë dollarë.

Ajo thotë se ajo ra në dashuri me njeriun që e njihte si Darnell ‘Jerry’ Michael pasi u takuan në platformën online www.match.com.

Por, fytyra me të cilën ajo ra në dashuri ishte e Flamur Gashit, ish-ambasador në Bosnje, i cili është i martuar, ka tre fëmijë dhe jeton në Shqipëri, ku ka pozitën e Këshilltarit të Presidentit.

Lexo po ashtu Mashtruesi përdor foton e vëllait të deputetit Arben Gashi, ia merr amerikanes plakë 270 mijë dollarë (Foto)

Standish tha se nuk kishte rezerva kur Michael filloi ta pyeste për paratë, pak pasi filluan të flisnin.

“Unë kurrë nuk mendova se dikush mund të bjerë në dashuri me dikë në telefon”, thotë ajo.

Aktualisht Ambasador Gashi është Këshilltar per Çështjet e Rajonit, i Presidentit te Shqipërisë Ilir Meta, pas kthimit nga Bosnja ka qene për tri vite Këshilltar i Presidentit Bujar Nishani.